Тошкент вилояти ҳокими Зоир Мирзаев масъуллар ваъдасини бажарса, фуқаро мурожаатига ижобий ечим топсагина аҳоли унга ишонишини, бошқарувга ишонишини, президент вакилига ишончи пайдо бўлишини айтди. Бу ҳақда ҳоким республика ишчи гуруҳи томонидан вилоят сектор раҳбарлари, вазирлик ва ташкилот раҳбарларининг Янгийўл туманидаги оммавий сайёр қабулида гапирди.
Очиқлик, ижтимоий тармоқ орқали халқ билан мулоқот қилиш раҳбар учун енгиллик бўлади. Масалан ижтимоий тармоқ орқали менга мурожаат қилишса, мурожаатни дарров скриншот қилиб, туман ҳокимига етказиб бераман. Биринчи навбатда ўзим жавоб бераман, лекин ҳокимига қайси шаҳарга тегишли эканлигини айтиб, етказаман. Бу муаммо ечимини тезлаштиради. Мурожаатчи фуқарога ҳокимга айтдим дейман, ҳоким ўн беш минутдан кейин унга алоқага чиқади. Фуқаро менга раҳмат айтади: “Ҳоким чиқди ёки раҳбар чиқди”, дейди. Бу нарса бизнинг ишимизни енгиллаштиради. Иккинчидан, давлатга бизнинг қандай тоифада бўлишимиздан қатъий назар, ҳокимият вакили ёки президент вакилига нисбатан ишончни кучайтиради. Бошқарувга ишонч бўлиши керак. Бошқарувга ишонч қачон кучаяди? Қачонки, айтилган ваъда бажарилса, фуқаро мурожаати жойида ҳал қилинса, бу эртага ўзини ўзи оқлайди, дейди Тошкент вилояти ҳокими.
Мурожаатчи фуқаро Гулноза Йўлдошеванинг айтишича, у республика ишчи гуруҳи вакиллари, айнан вилоят раҳбари Зоир Мирзаевнинг сешанба куни бўлиб ўтиши режалаштирилган қабулига ёзилиш учун ижтимоий тармоқлар орқали ҳокимга мурожаат қилган. Вилоят раҳбарининг ўзи у жавоб ёзиб, қабулга келиши мумкинлигини, шунингдек, муаммосига ечим қилишини ёзган.
Шахсан ҳокимнинг ўзи қабулга келинг дейиши, тағинам қабулга келган вақтингиз тармоқ орқали мурожаат қилган фуқаро эканимни айтиб, таниши ҳокимнинг шахсан ўзи ижтимоий тармоқлар орқали қилинган мурожаатларга жавоб бераётганидан далолат беради, дейди мурожаатчи.
Зоир Мирзаевнинг айтишича, 25 февраль куни бўлиб ўтган сайёр қабули унинг фаолияти давомидаги энг қисқа якунланган биринчи сайёр қабули бўлиб, 3,5 соат давом этган.
Олдин қабул ўтказган пайтимиз қабулдан кейин режалаштирилган ишларимиз чўзилиб кетарди. Энди, мана Худога шукур, секин-аста яхшиланмоқда. Лекин, барибир ҳаётда муаммо чиқади, бу ҳар бир оилада, иссиқ жойларда бўлгани каби. Бугунги мулоқотимиз республикадаги вазирлик идоралари вакилларининг келганлиги ва Халқ қабулхонасининг биринчи ўринбосари иштирок этгани боис ҳам енгил бўлди. Сабаби, ҳамма нарса маҳаллий ҳокимиятнинг қўлида эмас, ҳаммасини ҳал қилишга имконият ҳам йўқ. Қолган органларни ёнимизда кўриш бизларга далда берган. Шунинг учун бир қанча масалалар ҳам ҳал бўлди. Туманларда ҳам бугунги натижа ўз самарасини берди, деди ҳоким.
Тошкент вилояти ҳокими ҳокимликнинг ижтимоий тармоқлардаги саҳифаларига келиб тушаётган мурожаатларни шахсан ўзи назорат қилишини, уларга жавоб ёзиш учун вақт ажратишини эслатди.
Бугун қабул тугагач, Янгийўлдан Нурафшон шаҳрига етиб боргунимча йўлда, машинада 1 соат 20 дақиқа вақт кетади. Шу вақт оралиғида мен нима қиламан? Айнан шундай мурожаатларга жавоб ёзиб кетаман, деди Зоир Мирзаев.
Изоҳ (0)