Тошкент вилоятининг Паркент туманидан пойтахт Тошкент шаҳрига қадар темирйўл барпо этилмоқда. Электрлаштирилган темирйўл узунлиги 23,8 километр узунликда бўлади. Бу ҳақда Тошкент вилояти ҳокими Зоир Мирзаев ўзининг Telegram каналида маълум қилди.
Паркент туманини пойтахт билан боғловчи Байтқўрғон—Паркент электрлаштирилган темирйўл қурилиши жадал олиб борилмоқда. Бу йўлнинг умумий узунлиги 23,8 километрдан иборат. Лойиҳа доирасида 2 та ажратиш пункти, 4 та кўприк, 2 та йўл ўтказгич, 1 та туннел туридаги йўл ўтказгич, 78 та сув ўтказиш иншооти, 7 та автомобиль йўли ва темирйўли кесишмаси қурилиши режалаштирилган, дейди вилоят ҳокими бу ҳақда маълум қилар экан.
Ҳокимнинг маълумот беришича, у Паркент тумани аҳолиси билан очиқ мулоқот қилган.
-2s7Z1oio.jpg)
Гап шундаки, Паркент маркази шу кунларда кенг кўламли қурилиш фронтига айланган. Жумладан, Паркенцой бўйида янги, кенг ва шинам автойўл, кўп қаватли уй-жойлар, ижтимоий соҳа, савдо ва хизмат кўрсатиш объектларининг қурилиш жараёни бошланган. Шунингдек, туман марказидаги кўприк реконструкция қилиняпти, ёз ойларида транспорт оқими кўпаядиган асосий йўлни туннел орқали Заркент ва Сўқоқ йўлига улаш ишлари кетяпти, дейди у.
Зоир Мирзаев туманда амалга оширилаётган ишлар вилоятнинг туризм соҳаси ривожланиб, сайёҳлар оқими кўпайишига олиб келишини ёзмоқда.
Паркентда туризм инфраструктураси тубдан қайта кўриб чиқилмоқда, хизматлар соҳаси ривожланиши учун қулай шарт-шароит ҳозирланмоқда. Айниқса, Паркенцой бўйида қурилаётган 97 та кўп қаватли уй-жой, унинг пастки қаватларида ташкил этиладиган гастрономик объектлар, хизмат кўрсатиш ва савдо шохобчалари ҳудуднинг иқтисодий жозибадорлигини янада оширади, сайёҳлар оқимини кўпайтиради. Асосийси, қурилиш майдонининг фуқаролар фойдаланувида бўлган қисмида амалдаги қонунчиликка биноан, ўзаро келишув ва холис, адолатли баҳолашдан кейин ишлар бошланади. Ҳеч кимнинг норози бўлишига йўл қўйилмайди, дейди вилоят раҳбари.
Изоҳ (0)