Муроджон Абдураҳимов Халқ депутатлари Чирчиқ шаҳар кенгашининг қарори билан Чирчиқ шаҳар ҳокими этиб тайинланди. Бу ҳақда Тошкент вилояти ҳокимлиги матбуот хизмати хабар берди.
Муроджон Абдураҳимов 1986 йилда Чирчиқ шаҳрида туғилган. Маълумоти – олий. 2008 йил Тошкент давлат иқтисодиёт университетини, 2010 йил Тошкент давлат иқтисодиёт университетида магистратурани тамомлаган.
У Қибрай тумани “Байтқўрғон хизмат кўрсатиш ва иқтисодиёт” касб-ҳунар коллежида иқтисодиёт фани ўқитувчиси сифатида меҳнат фаолиятини бошлаган. Шунингдек, Тошкент вилояти ҳокимлигида, кейинроқ “Ўзкоммунхизмат” агентлиги, Ўзбекистон Республикаси Уй-жой коммунал хизмат кўрсатиш вазирлигида мутахассис, бош мутахассис, бўлим мудири сингари вазифаларда ишлаган.
Тайинловга қадар у Вазирлар Маҳкамасида масъул вазифада ишлаб келаётган эди.
- 13 март куни Тошкент вилоятининг Чирчиқ шаҳри ҳокими Даврон Ҳидоятов лавозимидан кетгани тўғрисида хабар берилганди.
- Даврон Ҳидоятов президентнинг 2021 йил 30 январдаги фармони билан лавозимидан озод этилган Тошкент вилояти ҳокими Рустам Холматовнинг ўрнига вилоят ҳокими вазифасини бажарувчи этиб тайинланган эди.
- Ўша йили ноябрь ойида эса вилоят ҳокимлигидан олиниб, Чирчиқ шаҳри ҳокими сифатида иш бошлаган.
- Даврон Ҳидоятов ўрнига Тошкент вилояти ҳокими вазифасини бажарувчи этиб Қашқадарёнинг собиқ ҳокими Зоир Мирзаев тайинланганди.
Изоҳ (0)