Самарқанд вилоятидаги мактабларнинг бирида директор ўқувчига тарсаки туширди. Вилоят Мактабгача ва мактаб таълими бошқармаси ҳолатга изоҳ берди.
Ишчи гуруҳга 50-мактаб директори маълум қилишича, 8-“А” синф ўқувчиси Ш.И . 2025 йил 17 март куни 3-соат биология дарсида синфдоши билан гаплашиб, жим ўтирмагани сабабли ўқитувчи К.Ў. томонидан танбеҳ берилган.
Аммо ўқувчи бундан хулоса чиқармасдан, ўқитувчини ҳақорат қилган. Шундан сўнг ўқитувчи ва ўқувчи ўртасида тортишув юзага келган. Бу ҳолатни ўқувчилардан бири мактаб директорига етказган.
Директор синфхонага келганда ўқувчи Ш.И. ўқитувчи К.Ў.ни ёқасидан ушлаб турганини кўриб, ажратишга ҳаракат қилгани ва жаҳл устида ўқувчининг юзига тарсаки туширганини ўз тушунтириш хатида баён этган.
Ҳолат ҳуқуқни муҳофаза қилувчи органлар томонидан ўрганилмоқда.
Икки кун аввал, 17 март куни вилоятнинг Каттақўрғон тумани 93-умумтаълим мактабида ўқувчининг онаси ўқитувчига тарсаки туширган эди.
Мактабдаги жанжаллар
Сирдарёда ўқитувчи 1-синф ўқувчисини қўлига игна санчиш билан жазолагани ҳақида хабарлар тарқалганди. Суриштирув давомида юқоридаги ҳолат тасдиғини топмаган.
Қашқадарёнинг Шаҳрисабз туманидаги мактабда ўқитувчи 5-синф ўқувчисини уриб жароҳатлади. Қарши шаҳридаги мактабда ўқитувчи ва ўқувчи ёқалашгани тасвирлари тарқалди. Алгебра фани ўқитувчиси ва 10-синф ўқувчиси бўлган икки қиз ўртасида ўзаро келишмовчилик келиб чиқиб, оғзаки тортишиб қолган. Уларнинг хатти-ҳаракатларига чора кўриш учун судга берилган.
Тошкентдаги мактабда аёл дастлабки иш кунида ўқувчини калтаклагани ҳам кенг муҳокамаларга сабаб бўлганди. Аёл жазоланиб, мактаб директори ишдан олинганди.
Изоҳ (0)