Ижтимоий тармоқларда Бухородаги мактабларда ўқувчилар совуқ қурол олиб юргани ҳақида хабар тарқалди. Вилоят Мактабгача ва мактаб таълими бошқармаси бунга изоҳ берди.
Айтилишича, Бухоро вилоятида ўқувчиларнинг бўш вақтларини самарали ташкил этиш, уларни ёт ғоялар таъсиридан ҳимоялаш, ўқувчи-ёшлар ўртасида ҳуқуқбузарликларнинг барвақт олдини олиш, уларнинг содир этилиш сабаблари ва шарт-шароитларини аниқлаш, таҳлил қилиш ва бартараф этиш борасида тизимли ишлар амалга ошириб келинмоқда.
Жумладан, ҳар ҳафтанинг пайшанба кунлари умумтаълим муассасаларида “Профилактика куни” этиб белгиланган бўлиб, шу куни ҳамкор ташкилотлар билан мактабларда “Тиғ” ва “Давомат” тадбирлари ўтказиб келинмоқда.
Шунингдек, мактаб ўқувчилари давомати тизимли равишда назоратга олинган бўлиб, мунтазам дарсга келмайдиган ўқувчиларни дарсга қайтариш бўйича мактаб, оила, маҳалла ва ҳуқуқ тартибот идоралари ҳамкорлиги йўлга қўйилган.
Хабарларда келтирилган ўқувчилар билан боғлиқ ҳолатлар жорий йилнинг 15 февралидан 15 март кунига қадар олиб борилган тадбирлар давомида аниқланган бўлиб, ҳолатларнинг ҳар бири ота-оналар иштирокида муҳокама қилиниб, улар ўртасида тушунтириш ишлари олиб борилган.
Болаларни тарбиялаш ва уларга таълим бериш борасидаги мажбуриятларни бажармагани учун ота-она ёки ота-она ўрнини босувчи васийларга нисбатан Маъмурий жавобгарлик тўғрисидаги кодекснинг 47-моддаси қўлланилган.
Мактабдаги жанжаллар
Аввалроқ Сирдарёда ўқитувчи 1-синф ўқувчисини қўлига игна санчиш билан жазолагани ҳақида хабарлар тарқалганди. Суриштирув давомида юқоридаги ҳолат тасдиғини топмаган.
Қашқадарёнинг Шаҳрисабз туманидаги мактабда ўқитувчи 5-синф ўқувчисини уриб жароҳатлади. Қарши шаҳридаги мактабда ўқитувчи ва ўқувчи ёқалашгани тасвирлари тарқалди. Алгебра фани ўқитувчиси ва 10-синф ўқувчиси бўлган икки қиз ўртасида ўзаро келишмовчилик келиб чиқиб, оғзаки тортишиб қолган. Уларнинг хатти-ҳаракатларига чора кўриш учун судга берилган.
Тошкентдаги мактабда аёл дастлабки иш кунида ўқувчини калтаклагани ҳам кенг муҳокамаларга сабаб бўлганди. Аёл жазоланиб, мактаб директори ишдан олинганди.
Ўқитувчига тазйиқ ўтказиш ҳолатлари
2024 йилнинг октябрида Сирдарё туманидаги 2-мактабда икки ўқувчи қиз ўқитувчини урганди. Ўша йилнинг апрелида Фарғонада мактаб ўқитувчиси ўқувчининг қариндошлари томонидан калтакланганди. 2023 йилнинг майида Фарғона вилояти Тошлоқ туманидаги мактабнинг бошланғич синф ўқитувчиси ўқувчисининг онаси томонидан калтакланганди. Сентябрь ойида Сурхондарёда мактаб директори ўқитувчининг яқин қариндошлари томонидан калтакланганди. Мазкур ҳолатлар юзасидан ҳуқуқбузарларга қилмишидан келиб чиққан ҳолда жазо чоралари кўрилган.
Шунингдек:
- Самарқандда аёл фарзандининг тарбияси ҳақида гапирган ўқитувчиларни ҳақоратлади
- Қашқадарёда ўқувчи ўқитувчисига тарсаки туширди
- “Ўқитувчига ҳеч қандай чора кўрилмаган”. Вазирликнинг Қашқадарёдаги мансабдори омбудсман маълумотининг бир қисмини рад этди
- Ўзбекистонда бир йилда 45 мингга яқин мактаб ўқувчиларининг ота-оналари жавобгарликка тортилди
Изоҳ (0)