“Анора” юлдузи ва “Оскар” совриндори: Майки Медисон аслида ким?

Майки Медисон актрисалик фаолиятининг бошиданоқ қисқа вақт ичида юлдузга айланди ва “Оскар” мукофоти пойгасида ҳатто Деми Мурни ортда қолдирди. Қуйида актриса ҳақидаги баъзи маълумотларни тақдим этамиз.

Медисон 1999 йилнинг 25 мартида дунёга келган. У Лос-Анжелес шаҳридан бўлиб, Сан-Фернандо водийсида улғайган. Унинг ота-онаси психолог. Медисон оиладаги беш фарзанднинг бири, унинг эгизак акалари, яна бир акаси ва иккита синглиси бор.

2024 йил сентябрь ойида Тhе Cut нашрига берган интервьюсида у 7-синфни тугатгач, уйда таълим олишга ўтганини айтади. Бу Медисонга севимли машғулоти — от спортига кўпроқ вақт ажратиш имконини беради. Август ойида у Esquire нашрига онаси ҳам, бувиси ҳам от минганини, шу сабабли у “юришни ўрганишдан аввал” от минганини сўзлаб беради.

“Мен кун бўйи отхонада бўлиш имкониятига эга бўлиш учун уйда таълим олишга ўтдим,” дейди у. “Менга отхонага бориш ва отларни парвариш қилиш билан боғлиқ жараён ёқарди, лекин бу ўзига хос яккаланишга олиб келадиган спорт тури. Мен бошқа йўналишни танлашим кераклигини ҳис қилдим”.

Ҳаммаси онаси уни актёрлик курсларига ёздириб келганидан кейин бошланди. Онаси Майкини қўллаб-қувватлар, кастингларга олиб борар ва ролларни ўрганишида ёрдам берарди.

“Улар саҳнадаги энг севимли партнёрим. Ойижон, сизни жуда яхши кўраман”, дейди Майки.

Актриса қайси фильмларда рол ўйнаган?

Медисон 14 ёшидан бошлаб кинода суратга туша бошлаган. Маълум муддат қисқа метражли фильмларда рол ўйнаган актриса 2017 йилда экранларга чиққан “Лиза, Лиза, кулранг осмон” номли тўлиқ метражли фильмда илк бор рол ижро этган. 2016 йилда қаҳрамонимиз “Ҳаммаси яхшиликка” сериалида Памела Адлоннинг ўсмир қизи ролини 2022 йилда сериал якунлангунга қадар ижро этган.

Январь ойида у Cut нашрига берган интервьюсида бу драмани “актёрлик санъатига кириш ва ҳақиқий кино мактаби бўлди” деб таърифлайди.

Унинг фильмографияси Квентин Тарантинонинг “Бир пайтлар Голливудда” фильмида Менсон оиласи аъзоси Сюзан “Сейди” Аткинс ролини ижро этиши ва 2024 йилда эфирга узатилган “Кўлдаги аёл” мини-сериалида рол ўйнаши билан бойиди.

2022 йилда юлдуз “Қичқириқ” франшизасига Эмбер Фримен ролини ижро этади.

У “Анора”га қандай келиб қолди?

Сценарий муаллифи ва режиссёр Шон Бейкер Медисонни “Бир пайтлар Голливудда” фильмида кўриб, кинотеатрдаёқ актриса билан боғланган. У “Анора” фильмининг сценарийсини ёзаётганда бош ролни айнан Медисон ижро этишини кўзда тутган.

Бейкер уни кастингсиз ролга тасдиқлаган. Айтганча, Майки ҳам сценарийни ўқимасдан, ролни қабул қилган.

“Мен сценарийни ўқишдан олдин розилик билдирганман”, дея у Cut нашрига айтиб ўтган. “Шон Бейкернинг ҳар қандай лойиҳасида иштирок этишни истардим”.

Ушбу рол учун Медисон рус тилида гапиришни ўрганади. “Анора” фильми бруклинлик қиз ҳақида ҳикоя қилади. У ўзи ишлайдиган тунги клубдан кетиш имкониятига эга бўлади — қиз россиялик олигархнинг ўғли билан танишиб, унга турмушга чиқади. Бироқ бу хабар Россияга етиб боргач, унинг эртакдек ҳаёти барбод бўлади ва эрининг ота-онаси никоҳни бекор қилишга уринади.

Актриса ҳақида қизиқарли маълумотлар

Майкининг Жем лақабли кучукчаси ва Бисквит номли мушуги бор. Майки кўп вақтини улар билан ўтказади. Бундан ташқари, актриса бўш вақтида ширинликлар тайёрлашни яхши кўради.

Медисоннинг айтишича, у ҳаётда босиқ ва камтар инсон — ўзининг жўшқин Анора образига умуман ўхшамайди.

“Мен жуда уятчан эдим. Биров билан гаплашишга тортинардим. Мактабда дарсда қўл кўтаришдан олдин руҳан тайёрланишимга тўғри келарди”, деб тан олади Майки.