7 апрель куни гонконглик актёр, режиссёр, оператор, мусиқачи, каскадёр, жанг санъати устаси Жеки Чан 70 ёшга тўлди. Жаҳон киносининг тирик афсонаси фильмдаги ажойиб ролларидан ташқари хайрия ишларига ҳам катта маблағ сарфлаши билан томошабинлар ҳурматини қозонган. Қуйида актёр ҳақида энг қизиқарли факт ва янглиш фикрларни тўпладик.
- Жеки Чаннинг ота-онаси шунчалик камбағал эдики, улар ҳатто ўғлини сотиб юбормоқчи бўлган
Актёр ҳақида тарқалган бу воқеа ҳақиқатдан йироқ. Жеки туғилган оила чиндан ҳам кам таъминланган эди ва улар уруш туфайли Хитойдан Гонконгга қочишга мажбур бўлди. Актёрнинг отаси Хитой ҳукуматига қарши бўлган Консерватив партиянинг махфий агенти сифатда ишлаган ва унга халқ душмани айблови қўйилган. Қамоқ жазосидан қутулиш учун Жекининг оиласи қочишга қарор қилади. Уларнинг ижарада яшаш ва фарзандининг туғилиши учун маблағи бўлмагач, атрофдагилардан ёрдам сўрашган. Шу тариқа Жеки Чанни чақалоқлигида сотиб юбориш ҳақидаги миф пайдо бўлган.
- Жеки Чан билан ҳеч қайси суғурта компанияси шартнома тузишни истамайди
Суғурта компаниялари актёр билан шартнома тузишдан қочади ёки доим ишни ортга суриб юради. Баъзилар Жеки Чанни тузатиб бўлмас мазохист деб ҳам атайди, чунки актёр фильмдаги барча мураккаб каскадёрлик ишларини мустақил бажарган ва турли жароҳатлар олишдан ҳеч қачон қўрқмаган. Ўзининг “Ҳеч қачон улғайманг” китобида Чан буни тан олади:
Масалан Брюс Лини олайлик. У жароҳат туфайли вафот этди ва бутун умрга афсона бўлиб қолди. Мен “Мўжизавий аслаҳалар” фильмида вулқон ичига тушиб кетиб ҳалок бўлганимда ҳам афсонавий актёр сифатида барчанинг ёдида қолган ва ҳаётимга чиройли якун ясаган бўлар эдим. Инсонлар Жеки Чан севган иши билан шуғулланаётганда вафот этгани ҳақида гапирарди. Лекин ростини айтсам, мен ўлишни, ҳатто нафақага чиқишни ҳам истамайман.
- Жеки Чаннинг синмаган суяклари қолмаган
Фото: Кинориум
Олган жароҳатларимнинг саноғи йўқ: мен жағимни уч марта синдирдим, бурним, барча бармоқларим, тиззам, сон суяги ва қовурғамни ҳам синдирдим, бош суягимни операция қилдирдим, — дейди актёр.
Аммо бир жароҳат унинг умрига зомин бўлиши мумкин эди. 1991 йилда Югославияда суратга олинган “Мўжизавий аслаҳалар” фильмида актёр 12 метрли девордан дарахт шохига сакраши лозим эди. Биринчи дублда Жеки буни уддалади, аммо иккинчи дублда у боши билан тошга йиқилди ва зудлик билан касалхонага олиб борилди. Муваффақиятли кечган операциядан сўнг Жеки Чан яна суратга олиш ишларига шўнғиб кетди. Бироқ синган бурун, тишлар, эшитмай қолган бир қулоқ билан актёр яна ишга қайтишига ҳеч ким ишонмаган эди.
- Жеки Чан уколдан қўрқади
Оқ халатли инсонлардан қўрқиши ҳақида актёрнинг ўзи тан олган:
Ҳаммасидан кўра инъекция юборишларидан қўрқаман. Баландлик, сичқонлар, илонлар менда қўрқув уйғотмайди, аммо шприцни кўришим билан оёқларим қалтирай бошлайди, — дейди актёр автобиографиясида.
- Актёр Голливудни ёқтирмайди
Фото: Дзен
Актёрнинг танилишига Голливуднинг ҳиссаси катта бўлса-да, Чан Америка фильмларини ёқтирмаслигини очиқ айтади. 2016 йилда кино саноатига қўшган ҳиссаси учун “Оскар” мукофотини олган бўлса-да, актёрнинг бундай фикр билдириши инсонларни ҳайратга солади:
Мен Жорж Лукас ёки Стивен Спилберг каби даҳолар билан ишласам ҳам, Голливудда машҳурликка эришмаган бўлардим. “Юра даври парки” фильмини эслаб кўринг. Энди у ерда роль ўйнаган актёрларнинг исмларини ёдга олишга ҳаракат қилинг. Томошабин фақат динозаврларни ва режиссёрнинг исмини эслайди. Аммо Осиёда ҳамма Жеки Чан фильмида Жеки Чанни кўриш учун келади. Фильм сюжети ёки сарлавҳаси қандай бўлиши муҳим эмас. Буни фақат Жеки Чан қила олади!
- Жеки Чан жуда сахий ва меҳрибон инсон
Юлдуз ўзини Хитойнинг ҳақиқий ватанпарвари деб билади. 1988 йилда у хайрия жамғармаси ташкил қилган ва ҳозиргача мамлакатнинг муҳтож аҳолисига ёрдам берди, талабаларга стипендия тўлашда кўмаклашади.
Жеки 50 нафар болани ўз қарамоғига олган ва 10 та етимни расман асраб олган. Хитойда актёрнинг Чан касалхонаси ишлайди. Мамлакат расмийлари унга жуда яхши муносабатда бўлиб, актёрга халқ қаҳрамони унвони берилган.
- Жеки Чан тўғри ёза олмайди ва яхши ўқимайди
Жеки Чан ҳақиқатан ҳам деярли саводсиз ва матнларни ўқишда она тилида ҳам, инглиз тилида ҳам қийналади. Мактабда ёш Жеки дарсларни кўп қолдирар ва яхши баҳога ўқимасди.
Шу сабабли, узоқ кутилган “Ҳеч қачон улғайманг” китоби ҳам унинг дўсти Жу Мо томонидан уч йил давомида ёзилган.
- Жеки Чан доимо соғлом турмуш тарзига амал қилган
Афсуски, бу ҳақиқат эмас. Катта шуҳратга эришган Жеки Чан юлдузлик касаллигига чалинди ва спиртли ичимликларга ружу қўйиб, катта миқдорда пул сарфлай бошлади. Актёр бу хатти-ҳаракатини камбағалликда ўтган болалиги сабаб деб изоҳлайди:
Қашшоқликда яшаганингиздан сўнг, катта пул сизга хавфсизлик ҳисси беради, — дейди актёр.
- Жеки Чан — ёмон ота
Актёр рафиқаси билан оилавий жанжал қилаётган пайтда икки ёшли ўғли Жейсини четга улоқтириб юборган. Яхшиямки, бола ерга эмас, диванга тушган. Бу воқеадан ҳали ҳам актёрнинг виждони қийналади. Кейинчалик у ўғлига кино саноатига киришига ёрдам беришга ҳаракат қилди. Жейси юлдуз отасининг изидан боргандек бўлди ва ҳатто фильмларда бир нечта ролларни олди. Аммо Жейси ёмон инсонлар тўдасига аралашиб қолди ва наркотик савдоси туфайли қамоққа тушди. Бу воқеа Жеки Чаннинг обрўсига жиддий зарба берди ва актёр оғир дамларда ўғлини қўллаб-қувватламади.
Агар унинг ақли бўлса, ўзи мустақил пул топиши мумкин. Ақли бўлмаса, у шунчаки меникини сарфлаб юраверади, — деди Жеки.
Шундай қилиб, Жеки Чан оиласида ҳеч ким унинг меросига даъвогарлик қила олмаслигини очиқлади. Унинг маблағи асосан хайрияга сарфланади.
Изоҳ (0)