Samarqand viloyatidagi maktablarning birida direktor o‘quvchiga tarsaki tushirdi. Viloyat Maktabgacha va maktab ta’limi boshqarmasi holatga izoh berdi.
Ishchi guruhga 50-maktab direktori ma’lum qilishicha, 8-“A” sinf o‘quvchisi Sh.I . 2025-yil 17-mart kuni 3-soat biologiya darsida sinfdoshi bilan gaplashib, jim o‘tirmagani sababli o‘qituvchi K.O‘. tomonidan tanbeh berilgan.
Ammo o‘quvchi bundan xulosa chiqarmasdan, o‘qituvchini haqorat qilgan. Shundan so‘ng o‘qituvchi va o‘quvchi o‘rtasida tortishuv yuzaga kelgan. Bu holatni o‘quvchilardan biri maktab direktoriga yetkazgan.
Direktor sinfxonaga kelganda o‘quvchi Sh.I. o‘qituvchi K.O‘.ni yoqasidan ushlab turganini ko‘rib, ajratishga harakat qilgani va jahl ustida o‘quvchining yuziga tarsaki tushirganini o‘z tushuntirish xatida bayon etgan.
Holat huquqni muhofaza qiluvchi organlar tomonidan o‘rganilmoqda.
Ikki kun avval, 17-mart kuni viloyatning Kattaqo‘rg‘on tumani 93-umumta’lim maktabida o‘quvchining onasi o‘qituvchiga tarsaki tushirgan edi.
Maktabdagi janjallar
Sirdaryoda o‘qituvchi 1-sinf o‘quvchisini qo‘liga igna sanchish bilan jazolagani haqida xabarlar tarqalgandi. Surishtiruv davomida yuqoridagi holat tasdig‘ini topmagan.
Qashqadaryoning Shahrisabz tumanidagi maktabda o‘qituvchi 5-sinf o‘quvchisini urib jarohatladi. Qarshi shahridagi maktabda o‘qituvchi va o‘quvchi yoqalashgani tasvirlari tarqaldi. Algebra fani o‘qituvchisi va 10-sinf o‘quvchisi bo‘lgan ikki qiz o‘rtasida o‘zaro kelishmovchilik kelib chiqib, og‘zaki tortishib qolgan. Ularning xatti-harakatlariga chora ko‘rish uchun sudga berilgan.
Toshkentdagi maktabda ayol dastlabki ish kunida o‘quvchini kaltaklagani ham keng muhokamalarga sabab bo‘lgandi. Ayol jazolanib, maktab direktori ishdan olingandi.
Izoh (0)