АҚШ президенти Дональд Трамп Америка Қўшма Штатлари, Россия ва Украина раҳбарлари иштирокидаги уч томонлама учрашув ўтказиш эҳтимоли борлигини тан олди. Бу ҳақда у ўзининг Truth Social ижтимоий тармоғидаги саҳифасида ёзди.
“Украина президенти Владимир Зеленский душанба куни тушдан кейин Вашингтонга, Овал кабинетга ташриф буюради. Агар ҳаммаси яхши ўца, кейин биз Россия президенти Владимир Путин билан ҳам учрашув уюштирамиз. Эҳтимол, бу миллионлаб одамларнинг ҳаётини сақлаб қолишга ёрдам берар. Бу масалага эътибор қаратганингиз учун ташаккур!”, дея ёзди Оқ уй раҳбари.
Трамп Аляскада Путин билан учрашуви жуда самарали ўтганини, шунингдек Зеленский ва бир қатор Европа раҳбарлари, жумладан, НАТО бош котиби Марк Рюттер билан телефон суҳбати ҳам жуда яхши кечганини таъкидлаган.
“Барча иштирокчилар Россия ва Украина ўртасидаги даҳшатли урушга чек қўйишнинг энг самарали усули - бу кўпинча бузилаётган оддий тўхтатиш битими эмас, балки тўғридан-тўғри урушни якунлайдиган тинчлик шартномасини имзолаш, деган хулосага келишди”, дея қўшимча қилди АҚШ президенти.
15 август куни Анкориждаги Элмендорф-Ричардсон ҳарбий базасида Трамп ва Россия Федерацияси президенти Владимир Путин ўртасида музокаралар бўлиб ўтди. Учрашувнинг асосий мавзуси Россия—Украина можаросини тугатиш масаласи бўлди. Вазирлар иштирокидаги “уч-учга” форматидаги учрашув 2 соат 45 дақиқа давом этди.
Америка президенти саммитдан сўнг Украинадаги можарони ҳал қилиш масаласи энди Зеленскийнинг қўлида эканини айтди. Трамп ҳозирча Украина бўйича ҳеч қандай келишув йўқлигини таъкидлади.
Изоҳ (0)