Ёшлигида Уэнздей образи билан танилган актриса Кристина Риччига Голливуднинг Шон-шараф хиёбонида ўз юлдузи топширилди. Унинг юлдузи 2803-рақамга эга бўлди.
“Бундай эътироф мен учун жуда кўп нарсаларни англатади. Аслида табиатан ҳис-туйғуларини таъсирчан ифодалайдиган одам эмасман, аммо бундай қадрни алоҳида қайд этиш ва ташаккур билдириш мен учун муҳим”, деди Риччи Variety нашрига берган интервьюсида.
Маросимда актрисани яқин қариндошлари, турмуш ўртоғи Марк Ҳемптон, қизи Клео ва ўғли Фредди қўллаб-қувватлаш учун ташриф буюрди.
Маълумот учун, Кристина Риччи 1980 йил 12 февралда АҚШнинг Калифорния штати, Санта-Моника шаҳрида туғилган. У тўрт фарзандли оиланинг кенжаси бўлиб, онаси Сара Мердок риэлтор, отаси Ралф Риччи эса адвокат эди.
Риччи 9 ёшида “Сув парилари (1990) фильмида дебют қилди. Унинг фаолиятидаги энг машҳур фильм 1991 йилда чиққан “Адамслар оиласи”дир. У Уэнздей ролини ўйнаганида 11 ёшда эди. “Аддамслар оиласи” Кристинанинг карьераси учун ажойиб трамплин бўлди.
Сўнг актриса иштирокидаги “Уйқу бўшлиғи” тижорий муваффақият ва танқидчилар эътирофига сазовор бўлди. Риччи Катрина Ван Тассел роли учун “Сатурн” мукофотига сазовор бўлди. Кейинги 5 йил Кристина учун шон-шуҳрат йиллари бўлади: актриса машҳур телекўрсатувларга чақирилди ва кино танқидчилари унинг маҳорати ҳақида мақтовли шарҳлар ёзди. 2022 йил охирида “Уэнздей” сериалининг ремейки чиқди. Янги лойиҳада актриса маккор ботаника ўқитувчиси сифатида қайта туғилди.
Таниқли асарлар орасида арвоҳ ҳақидаги “Каспер” ва, албатта, Тим Бёртоннинг “Уйқу бўшлиғи” фильмини эслаш мумкин.
Изоҳ (0)