Сурхондарё вилоятининг Денов туманида сифатини тасдиқловчи ҳужжатлари бўлмаган дори воситаларини сотувга қўйган дорихона фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, “Э.О.” МЧЖга раҳбари Ш.А. дорихонада турли номдаги сифатини тасдиқловчи ҳужжатлари бўлмаган, умумий баҳоси 575,4 млн сўмлик дориларни савдога қўйгани аниқланди.
Маълумотларг кўра, дорихонадан жами 198,2 минг дона, шундан 1 396 дона психотроп, 900 дона кучли таъсир қилувчи ҳамда 3 146 дона яроқлилик муддати ўтган дорилар ашёвий далил сифатида олинган.
Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Дори воситаларининг ноқонуний савдоси
Ўзбекистонда 2024 йилнинг 10 ойида 2,5 мингдан зиёд қалбакилаштирилган дорилар аниқланган эди. Тақдим қилинган дори воситалари ва тиббий буюмлар ўрнатилган тартибда лаборатория текширувидан ўтказилганда, таҳлил натижаларига кўра, ноқонуний муомалада бўлган:
- 5 958 ўрам — давлат рўйхатидан ўтган ва мувофиқлик сертификати мавжуд;
- 17 925 ўрам — давлат рўйхатидан ўтмаган ва мувофиқлик сертификати мавжуд бўлмаган;
- 557 ўрам — ёрлиқлаш кўрсаткичи бўйича номувофиқ (контрафакт);
- 1 549 ўрам — яроқлилик муддати тугаган (сифатсиз);
- 2 524 ўрам — қалбакилаштирилган умумий 52 396 ўрам фармацевтика маҳсулотларининг тиббиёт амалиётида қўллаш мумкин эмаслиги юзасидан хулоса берилди.
Ушбу сифатсиз, қалбакилаштирилган ва Ўзбекистонга ноқонуний кириб келган фармацевтика маҳсулотлари айланмасининг олди олинди.
Август ойида Андижонда ноқонуний дори воситалари савдоси билан шуғулланганларга ҳукм ўқилганди. Дори воситаларининг умумий қиймати 1 млрд 616 млн 802 минг сўмни ташкил қилган. Жиноят ишлари бўйича Қўрғонтепа туман суди томонидан фуқарога нисбатан 5 йил ҳамда шеригига нисбатан 3 йил муддатга озодликдан маҳрум қилиш жазоси тайинланган.
Сентябрь ойида Тошкент вилоятининг Оҳангарон туманида ноқонуний дори воситалари савдоси билан шуғулланиб келган шахслар ушланган. Октябрь ойида Тошкент шаҳрида 2,2 млрд сўмлик яроқлилик муддати ўтган дори воситаларини муомалага киритилишининг олди олинганди.
Шунингдек, Хоразмда қарийб 240 млн сўмлик дорилар ноқонуний сотилишининг олди олинди. Бундан ташқари, Тошкент шаҳрининг Чилонзор туманида 4 000 қути қалбаки дори воситаларини сотаётган шахслар ушланди.
Изоҳ (0)