Индонезияда йўтал сиропи туфайли 200 дан ортиқ боланинг ўлимига алоқадор Afi Farma фирмасининг бошлиғи ва яна уч нафар амалдори қамоққа олинди. Бу ҳақда BBC хабар берди.
Улар икки йиллик қамоқ жазосига ҳукм қилиниб, 1 миллиард Индонезия рупияси (тахминан 63 056 доллар) миқдорида жаримага тортилган. Afi Farma фирмаси таркибида ортиқча миқдорда заҳарли моддалар бўлган йўтал сиропларини ишлаб чиқаришда айбланган.
Компания адвокати айбловни рад этиб, апелляция шикояти беришни кўриб чиқмоқда. Прокурорлар Afi Farma бош директори Ариэф Прасетя Ҳҳараапни тўққиз йилгача, қолган айбланувчиларни эса етти йилдан қамоқ жазосига ҳукм қилишни сўраган.
Прокурорнинг таъкидлашича, 2021 йилнинг октябридан 2022 йилнинг февралига қадар компания йўталга қарши сироп тайёрлаш учун ишлатиладиган пропилен гликолнинг иккита жўнатмасини олган. Уларда 96 фоиздан 99 фоизгача этилен гликол бўлган. Иккала модда ҳам эритувчиларга қўшимча сифатида ишлатилиши мумкин.
“Пропилен гликол токсик бўлмай, дори-дармонлар, косметика ва озиқ-овқатда кенг қўлланилса-да, этилен гликол заҳарли бўлиб, бўёқ, қалам ва тормоз суюқлигида ишлатилади”, — дейилади хабарда.
Прокурорларнинг таъкидлашича, компания йўтал сиропида ишлатиладиган ингредиeнтларни синовдан ўтказмаган ва бунинг ўрнига етказиб берувчининг сифат ва хавфсизлик сертификатларига таянган.
Afi Farma’нинг адвокати Самсул Ҳидоятнинг BBC’га айтишича, Индонезиянинг дори воситаларини тартибга солувчи органи дори ишлаб чиқарувчилардан ингредиeнтларни қаттиқ синовдан ўтказишни талаб қилмаган.
Шарқий Яванинг Кедири туман суди судьяси тўрт нафар айбланувчини хавфсизлик стандартларига жавоб бермайдиган фармацевтика маҳсулотларини қасддан ишлаб чиқаришда айбдор деб топди.
2022 йилдан бери 200 дан ортиқ индонезиялик болалар, уларнинг аксарияти беш ёшга тўлмаган, йўтал сиропи билан боғлиқ ўткир буйрак етишмовчилиги туфайли вафот этди. Гамбия ва Ўзбекистонда 100 га яқин ўлим қайд этилган.
Жаҳон соғлиқни сақлаш ташкилоти (ЖССТ) Ҳиндистон ва Индонезияда ишлаб чиқарилган олтита йўтал сиропи ҳақида огоҳлантирган.
Изоҳ (0)