Фармацевтика тармоғини ривожлантириш агентлиги ўзбекистонликларни сифатли, хавфсиз ва безарар дори воситалари билан таъминлаш мақсадида дори воситаларини ишлаб чиқарувчиларга мурожаат қилиб, уларни огоҳлантирди. Бу ҳақда “Дарё”га агентлик ахборот хизмати раҳбари Севара Тўлаганова хабар берди.
Айтилишича, 2024 йил 1 январдан бошлаб GxP давлат стандарти жорий этилмаган тармоқ тадбиркорлик субъектларининг фармацевтика фаолияти учун берилган лицензиянинг амал қилиши тўхтатиб қўйилади ёки бекор қилинади.
GxP талабларини жорий қилиш орқали аҳолини сифатли, хавфсиз ва безарар дори воситалари билан таъминлаш имкониятига эга бўламиз. Шунингдек, корхона ходимлари ўзларига юклатилган вазифаларни ўз вақтида сифатли бажаришига, фармацевтика маҳсулотлари хавфсизлиги ишончли ҳужжатлар билан тасдиқланишига, корхоналарда халқаро талабларга жавоб берадиган сифат тизимининг яратилишига эришамиз. Ва маҳаллий маҳсулотларнинг рақобатбардошлиги ҳамда чет эл давлатларига экспорт қилиниши учун кенг йўл очиб берилишини таъминлаймиз, — дейди Севара Тўлаганова.
Масъулларнинг аниқлик киритишича, ушбу вазифаларни амалга ошириш мақсадида президентнинг 2019 йил 10 апрель куни фармони чиққан бўлиб, фармацевтика тармоғи ҳамда республика соғлиқни сақлаш тизимидаги ташкилотлар 2022 йил 1 январга қадар тегишлилиги бўйича GxP талабларига мувофиқ мажбурий сертификатлаштирилиши лозимлиги белгиланган.
Кейинчалик бу муддат президентнинг 2022 йил 21 январдаги фармонига асосан 2024 йил 1 январга қадар узайтирилган. Шунингдек, мазкур фармонга биноан 2022 йил 1 апрелдан фармацевтика соҳасида янги ишлаб чиқарувчи корхоналар, улгуржи ва чакана савдо ташкилотлари мос равишда “Зарур ишлаб чиқариш амалиёти (GMP)”, “Зарур дистрибюторлик амалиёти (GDP)” ва “Зарур фармацевтика (дорихона) амалиёти (GPP)” талабларига мувофиқ равишда ташкил этилиши лозим. 2022 йил 1 февралдан маҳаллий ишлаб чиқарувчи ташкилотларнинг фармацевтика маҳсулотларини хорижий давлатларда рўйхатдан ўтказиш харажатларининг 75 фоизи улар рўйхатдан ўтказилганини тасдиқловчи ҳужжат тақдим этилганидан сўнг Фармацевтика тармоғини қўллаб-қувватлаш ва ривожлантириш жамғармасидан қоплаб берилиши ва 2023 йил 1 январдан фармацевтика маҳсулотлари бўйича давлат харид танловларида фақатгина “Зарур ишлаб чиқариш амалиёти (GMP)” стандартлари асосида дори воситаларини, ISO:13485 стандартлари асосида тиббий буюмлар ва тиббий техникани ишлаб чиқаришни ташкил этган ташкилотлар ва “Зарур дистрибюторлик амалиёти (GDP)” стандартларини жорий этган улгуржи савдо ташкилотлари қатнашишига рухсат берилиши белгиланган, — дейди масъул.
Қўшимча қилинишича, бугунги кунда республикада дори воситаларини ишлаб чиқарувчи маҳаллий корхоналар сони 82 тани ташкил этиб, уларнинг 40 тасида, жами 147 та ишлаб чиқариш линияларида “Зарур ишлаб чиқариш амалиёти — GMP” давлат стандарти талаблари жорий қилинган. Фармацевтика маҳсулотларини улгуржи сотиш билан шуғулланувчи 600 га яқин маҳаллий корхоналар мавжуд бўлиб, уларнинг 117 тасида “Зарур дистрибюторлик амалиёти — GDP” давлат стандарти талаблари жорий қилинган. Клиниколди тадқиқотлар ўтказувчи лабораториялар сони 6 тани ташкил этиб, улардан 1 тасида “Зарур лаборатория амалиёти — GLP” сертификати мавжуд. Клиник тадқиқотлар ўтказувчи клиник базалар сони 88 та, фармацевтика маҳсулотларини чакана реализация қилувчи дорихоналар сони 16 мингга яқин бўлиб, уларнинг бирортаси ҳам “Зарур клиника амалиёти — GCP” ва “Зарур дорихона амалиёти — GPP” сертификатларини олмаган.
Бу рақамлар фармацевтика тармоғи ва республика соғлиқни сақлаш тизимидаги ташкилотларнинг аксарияти тегишлилиги бўйича GxP талабларини ўз иш фаолиятида жорий қилмаганини кўрсатади. Шу сабаб Фармацевтика тармоғини ривожлантириш агентлиги фармацевтика тармоғи ва республика соғлиқни сақлаш тизимидаги ташкилотларида GxP талабларини жорий этиш ва модернизация ишларини олиб бориш бўйича лойиҳаларни ишлаб чиқиш ҳамда ўрнатилган муддатлар ичида амалга оширишга чақириб қолади ва бу масалада амалий ёрдам беришга тайёр эканлигини маълум қилади, — дейди Севара Тўлаганова.
Изоҳ (0)