Андижонда вилоят ҳокими Шуҳрат Абдураҳмонов ҳамда собиқ соғлиқни сақлаш вазири Алишер Шодмонов ўртасидаги можарога сабаб бўлган завод айни кунда йилига 180 миллион дона бир марталик шприц ишлаб чиқармоқда. Бу ҳақда Фармасевтика тармоғини ривожлантириш агентлигининг ОАВ вакиллари учун ҳудуддаги дори воситалари ва тиббий буюмларни ишлаб чиқарувчи корхоналарга қилган пресс-тури давомида маълум қилинган.
Пресс-турда бўлган “Дарё” мухбирининг маълумот беришича, шу кунларда Андижон шаҳрида автомобилсозлик, электротехника, тўқимачилик, чарм-пойабзал , мебелсозлик, фармацевтика, кимё саноати, қурилиш материаллари ҳамда озиқ-овқатни ишлаб чиқариш соҳаларига ихтисослашган ҳудудий тармоқлараро саноат кўргазмаси ҳам ўтказилган.
Агентлик масъул ходими Саид Холматовнинг таъкидлашича, айни пайтда вилоятда 37 та фармацевтика йўналишидаги корхоналар фаолият кўрсатаётган бўлиб, уларда 215 турдаги дори, тиббий буюм ва техникалар ҳамда биологик фаол қўшимчалар ишлаб чиқарилмоқда. Ушбу корхоналар томонидан 520 минг долларлик маҳсулотлар экспорт қилинган.
Пресс-тур давомида журналистлар, шунингдек, тиббий буюм ва техникалар ишлаб чиқарувчи корхона фаолияти билан ҳам танишган. “Макро Фарм Андижон” масъулияти чекланган жамиятига тегишли корхонада айни кунда тўрт хил ҳажмдаги 180 миллион дона бир марталик шприцлар ҳамда 20 миллион дона инфузион тиббиёт системалари ишлаб чиқарилмоқда.
Қайд этиш лозим, ушбу корхона 2019 йилда Андижон ҳокими ва ўша вақтдаги соғлиқни сақлаш вазири Алишер Шодмонов можаросига сабаб бўлганди. Ўшанда вилоят ҳокими топшириғи асосида соғлиқни сақлаш бошқармасига “Макро Фарм Андижoн” МЧЖ билан қонун талабларига зид равишда тузилган тўғридан тўғри шартномалар асосида жами 6,3 миллиард сўмлик мувофиқлик сертификати мавжуд бўлмаган шприц ва системалар сотиб олингани таъкидланган.
Журналистлар пресс-тур давомида Андижон туманидаги инсулин ишлаб чиқарувчи Zamin Bio Health корхонаси фаолияти билан ҳам танишган. Умумий лойиҳа қиймати қарийб 28 миллиард сўм бўлган ушбу корхонага Германия, Франция, Швейцария, Хитой, Ҳиндистон давлатларидан замонавий ускуна ва технологиялар олиб келиб ўрнатилган. Бугунги кунга келиб, инсулин дори воситаси сифатли, халқаро стандартлар талаблари даражасида ишлаб чиқарилмоқда.
Корхона менежери Хуршидбек Юсуповнинг айтишича, ушбу завод 2019 йилда тўлиқ қувватда ишга туширилган бўлиб, шу кунга қадар республика бўйлаб инсулин дори воситасини етказиб бермоқда. Шу пайтга қадар жами 3 миллионга яқин инсулин тиббиёт муассасаларига етказиб берилган. Сифат жиҳатидан эса Европа ва Бирлашган Араб амирликларида ишлаб чиқариладиган инсулин сифати билан тенг ҳисобланади.
Келгусида маҳсулотимизни хориж мамлакатларига ҳам экспорт қилишни режалаштирганмиз. Бунинг учун салоҳиятимиз етарли, фақат инсулин специфик маҳсулот бўлгани учун уни экспорт қилинаётган мамлакатда давлат рўйхатидан ўтказиш лозим. Шу сабабли айни пайтда қўшни Афғонистон, Тожикистон ва Қирғизистон Республикаларининг Соғлиқни сақлаш вазирликларига ариза билан мурожаат қилганмиз. Мазкур давлатларда ҳам сертификатга эга бўлганимиздан сўнг инсулин экспорти ҳам йўлга қўйилади, — дейди Хуршидбек Юсупов.
Изоҳ (0)