Ҳиндистонда ишлаб чиқарилган йўтал сиропининг 300 дан ортиқ намуналари таркибида хавфли заҳарли моддалар мавжудлиги сабабли сифат стандартларига жавоб бермаслиги аниқланган.
Бу ҳақда Ҳиндистон соғлиқни сақлаш ва оилани қўллаб-қувватлаш вазирлиги ҳисоботига таяниб, The Economic Times газетаси хабар берди.
Маълумотларга кўра, Ҳиндистоннинг Дори воситалари стандартларини назорат қилиш марказий ташкилоти томонидан дори воситаларининг 7 мингдан ортиқ намуналари текширилганда уларнинг 335 тасида диэтиленгликол ва этиленгликол хавфли моддалари борлиги аниқланган.
Жаҳон соғлиқни сақлаш ташкилоти (ЖССТ) 2022 йил октябрь ойида Ҳиндистоннинг Maiden Pharmaceuticals компанияси томонидан ишлаб чиқарилган тўртта болалар дори-дармонлари Гамбияда 66 боланинг ўлимига алоқадор бўлиши мумкинлиги ҳақида хабар берганидан сўнг, Ҳиндистон ҳукумати йўтал сироплари сифатини назорат қилишни кучайтирди.
ЖССТ прометазиннинг ичиш учун тайёрланган эритмаси, “Кофехмалин” ва “Макофф” болалар учун йўтал сироплари ҳамда компания томонидан Sonipat корхонасида ишлаб чиқарилган шамоллашга қарши “Магрип Н” сиропи таркибида болаларнинг буйракларига зарар етказиши мумкин бўлган токсинлар мавжудлигини аниқлади.
Ҳиндистонда ишлаб чиқарилган “Док-1 Макс” сиропини истеъмол қилиш ортидан 2022 йилда Ўзбекистонда ҳам 68 нафар бола вафот этгани ва 16 нафар бола ногирон бўлиб қолгани маълум қилинганди.
“Дарё” мазкур ҳолат билан боғлиқ суд жараёнларини мунтазам ёритиб келмоқда.
Изоҳ (0)