АҚШ чегара хизмати 2024 йилда Канада чегарасидаги Суонтон ҳудудида 19 мингдан ортиқ ҳужжатсиз мигрантни ҳибсга олди. Бу ҳақда сектор чегара хизмати бош агенти Роберт Гарсия Х ижтимоий тармоғидаги саҳифасида маълум қилган.
“Суонтон чегара хизмати ходимлари 2023 йил 1 октябрдан буён 97 та давлатдан келган 19 200 дан ортиқ одамни ҳибсга олди, бу охирги 17 йилдагидан кўра кўпроқ”, деб ёзди у.
Суонтон сектори Вермонт штатида жойлашган бўлиб, Канаданинг Квебек ва Онтарио провинциялари билан чегарадош ҳисобланади.
2020 йили қўлга олинган ҳужжатсиз муҳожирлар сони 574 тани, 2021-молия йилида эса 365 тани ташкил этган. Кейин бу кўрсаткич сезиларли даражада ўсиб, 2022 ва 2023 йилларда мос равишда 1 000 ва 6 900 тага етди.
Хорижий ОАВ хабарларига кўра, АҚШ чегараларидаги ноқонуний мигрантлар билан боғлиқ вазият кўпинча Республикачилар партияси томонидан Оқ уйнинг амалдаги маъмурияти танқид қилинишига сабаб бўлади.
Хусусан, АҚШнинг амалдаги президенти Жо Байден ҳамда вице-президент Камала Ҳарриснинг ҳаракатсизлиги туфайли АҚШга кўплаб ноқонуний мигрантлар, шу жумладан, жиноятчилар ва руҳий носоғлом шахслар кириб келгани айтилади.
Изоҳ (0)