“Галатасарой” клуби “Фенербаҳче” устозининг ирқчиликка оид баёнотлари бўйича прокуратурага ариза топширади ҳамда УЕФА ва FIFA’га расмий шикоят юборади. Бу ҳақда клуб матбуот хизмати хабар берди.
Футбол бўйича Туркия чемпионатининг 25-туридан ўрин олган “Галатасарой” — “Фенербаҳче” учрашуви 25 февраль куни бўлиб ўтди ва томонлар 0:0 ҳисобида дуранг ўйнади.
Ўйиндан сўнг меҳмонлар устози Жозе Моуриньо билдирган фикрлар кўплаб муҳокамаларга сабаб бўлмоқда.
“Мен ҳакамга раҳмат айтишим керак. Баҳсли вазиятларда рақиб ўриндиғида ўтирганларнинг ҳаммаси маймундек сакрашди. Агар ўйинни туркиялик ҳакам бошқарганида, учрашув умуман бошқача тарзда ўтган бўларди”, деди португалиялик мутахассис.
Галатасарой клуби португалиялик мутахассис устидан УЕФА ва FIFA’га шикоят қилишини маълум қилди.
“Фенербаҳче” бош мураббийи Жозе Моуриньо Туркияда ишлай бошлаганидан бери турк халқига нисбатан камситувчи фикрларни мунтазам билдириб келади. Энди эса у ўзининг ахлоқсиз баёнотларига инсонийликдан йироқ гапларини ҳам қўшди. Шуни маълум қиламизки, Моуриньонинг ирқчиликка оид сўзлари бўйича прокуратурага ариза берамиз ҳамда УЕФА ва FIFA’га шикоят йўллаймиз”, дейилади клуб баёнотида.
Маълумот учун, 62 ёшли Моуриньо 2024 йил июнь ойидан бери “Фенербаҳче”ни бошқариб келмоқда. Унинг бошқарувида жамоа айни пайт 58 очко билан 2-ўринда кетмоқда. “Галатасарой” эса 64 очко тўплаган ҳолда турнир жадвалида етакчилик қилмоқда.
Изоҳ (0)