Турк шоу-бизнеси янгиликлари: миш-мишларга нуқта қўйган Ҳанде Эрчел, автоҳалокатга учраган актёр, Бурак Ўзчивит оиласида байрам

Мазкур турк шоу-бизнеси юлдузларини турли фильм ва сериаллар орқали яхши танийсиз, лекин уларнинг кадр ортидаги ҳаёти ҳақида кўпчиликка маълум эмас.

Мурат Юналмиш ва оиласи табиат қўйнида

Томошабинларга “Гулжамол” сериали орқали таниш актёр Мурат Юналмиш рафиқаси Нутия Акар ва ўғли билан қор ёғишини томоша қилиб тушган суратларини ижтимоий тармоқдаги саҳифасига жойлади.

“Самовий муҳаббат”, “Телба юрак”, “Чукуровда бир кун” каби муваффақиятли спектаклларда иштирок этган Мурат Юналмиш ўтган йилнинг апрель ойида ўғил фарзандли бўлди ва унга Селим Баран деб исм қўйди.

Толга Сариташ автоҳалокатга учради

Туркиянинг машҳур “Разведка” сериалида бош роллардан бирини ижро этаётган таниқли актёр Толга Сариташ автоҳалокатга учради. Муҳабир Online тарқатган хабарга кўра, воқеа актёрнинг машинаси ортидан бошқа бир транспорт воситаси келиб урилиши оқибатида содир бўлган. Етказилган моддий зарарга қарамай, Толга Сариташнинг ўзи жабрланмаган ва унинг соғлиғи яхши деб баҳоланмоқда.

Ҳозирча актёр бахтсиз ҳодиса юзасидан расмий баёнот бермади. Мухлислар уни қўллаб-қувватлаб, севимли актёри билан ҳаммаси жойида эканлигидан хурсанд.

Мине Демирташ 17 ёшда: бутун суратга олиш гуруҳи актрисани табриклади

“Қизил ғунчалар” сериалидаги Зейнеп образи билан танилган истеъдодли ёш актриса Мине Демирташ 17 ёшни қарши олди. Бу ўзига хос кунни суратга олиш майдончасидаги ҳамкасблари эътибордан четда қолдиришмади, улар ёш юлдузни табриклашди.

Миненинг ҳамкасбларидан бири Мерт Язижиўғли ижтимоий тармоқлардаги саҳифасида туғилган кун эгасининг суратини жойлаштирди ва “Туғилган кунинг билан!” деб табрик ёзди. Суратга олиш гуруҳининг бошқа аъзолари ҳам байрамга қўшилиб, Мине учун суратга олиш майдончасида торт ва илиқ тилаклар билан кичик байрам уюштиришди.

Гулсим Али 30 ёшни қаршилади

“Қалб тоғи” сериалида Дилек ролини ижро этган Гулсим Али 30 ёшини Куручешмада ўтказилган тадбирда нишонлади.

“Мен 30 ёшга тўлдим. Бу ёш менга шунчалик кўп гўзаллик олиб келдики, мен ҳар доим орзу қилган нарсаларга эришдим”.

Гулсим Али янги ёшида муҳаббат излаётгани ҳақида гапирар экан, қўшимча қилди: 

“Ҳатто онам ҳам: Энди бизни хурсанд қил, қизим, деяпти. Менинг севгилим келишган ва қалби гўзал бўлса кифоя”.

Ҳанде Эрчел ва Ҳакан Сабанжининг ажралиши ҳақидаги миш-мишларга фотожавоб

Туркия шоу-бизнесининг энг кўп муҳокама қилинадиган жуфтликларидан бири Ҳанде Эрчел ва Ҳакан Сабанжи ажралишлари ҳақидаги миш-мишларга барҳам беришга қарор қилишди ва биргаликда таътилга чиқишди. Яқинда оммавий чиқишлар қилмагани учун эътибор марказида бўлган жуфтлик Испания пойтахти Мадридда тушган суратларини эълон қилди ва уларнинг муносабатлари ҳали ҳам мустаҳкам эканини тасдиқлади.

Жуфтлик бирга вақт ўтказишга ва Испанияда дам олишдан завқланишга қарор қилди. Ҳанде Эрчел Instagramъдаги саҳифасида ҳозирда Испания клубида тўп сураётган туркиялик футболчи Арда Гулер иштирокидаги футбол учрашувига ташриф буюрганидан лавҳалар билан бўлишди.

Керемнинг туғилган кунини бутун оила нишонлади

Фаҳрие Эвжен ва Бурак Ўзчивит иккинчи ўғли Керемнинг туғилган кунини нишонлаб, ижтимоий тармоқлардаги саҳифаларига пост жойлашди.

2017 йилда турмуш қурган Фаҳрие Эвжен ва Бурак Ўзчивит, 2019 йилда Каран исмли ўғил кўриб, илк марта ота-она бўлишганди. 2023 йил 18 январда эса иккинчи бор фарзандли бўлиш бахтига эришдилар.

Актёрлар жуфтлиги икки ёшга тўлган ўғиллари Керемнинг туғилган кунини динозаврлар мавзусидаги зиёфат билан нишонлашди. Туғилган кун зиёфатидан сўнг, Фаҳрие Эвжен ижтимоий тармоқлардаги саҳифасида байрам суратларини эълон қилди.

Актриса ўз постига қуйидаги табрикни қўшди: “Керемим, гул исли ўғлим, жоним... Сени жуда қаттиқ яхши кўраман”.