Сирдарё вилояти ҳокимига қишлоқ ва сув хўжалиги ҳамда молия-иқтисодиёт ва камбағалликни қисқартириш масалалари бўйича ўринбосарлар тайинланди. Бу ҳақда вилоят ҳокимлиги матбуот хизмати хабар берди.
Аброр Хидиров вилоят ҳокимининг қишлоқ ва сув хўжалиги масалалари бўйича ўринбосари — қишлоқ хўжалиги бошқармаси бошлиғи вазифасини бажарувчи этиб тайинланган.
Шунингдек, Фахриддин Кушаков вилоят ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари – иқтисодиёт ва молия бош бошқармаси бошлиғи лавозимига тайинланди.
Мазкур тайинловга қадар Кушаков иқтисодиёт ва молия бош бошқармаси бошлиғи ўринбосари лавозимида фаолият олиб борган.
Алишер Хидиров 4 февралдан Сирдарё вилояти ҳокимининг қурилиш, тўсиқларсиз муҳит яратиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари этиб тайинланган эди.
2025 йил 16 январь куни президент раислигида бўлиб ўтган йиғилишда Сирдарё вилояти ҳокими Акмалжон Маҳмудалиев лавозимидан озод этилганди. Бунга ҳудудида инвестицияларни жалб қилиш, қишлоқ хўжалигини ривожлантириш ва бошқа йўналишлардаги фаолиятда жиддий камчиликларга йўл қўйгани сабаб бўлди.
Унинг ўрнига 2018 йил июлдан буён Самарқанд вилояти ҳокими лавозимида ишлаб келган Эркинжон Турдимов Сирдарё вилояти ҳокими вазифасини бажарувчи этиб тайинланди.
Изоҳ (0)