Бугун, 2023 йилнинг 30 апрель куни соат 08:00 дан бошлаб Ўзбекистоннинг барча ҳудудларида Конституциявий ўзгаришларга бефарқ бўлмаганлар учун референдумда овоз бериш жараёнлари бошлаб юборилди. Жумладан Президент администрацияси раҳбари Сардор Умурзоқов бошчилигидаги администрация масъуллари — Президент администрацияси раҳбарининг ўринбосари Комил Алламжонов, президент матбуот котиби Шерзод Асадов, шўба мудири Саида Мирзиёева референдумда овоз берди.
Бугун, шунингдек, Қорақалпоғистон Жўқорғи Кенгеси раиси ҳамда вилоят ҳокимлари ҳам ўзлари рўйхатда турган ҳудудлардаги референдум участкаларида бўлиб, фуқаролик ҳуқуқидан фойдаланди.
Қорақалпоғистон Жўқорғи Кенгеси раиси Аманбай Ўринбаев Нукус шаҳридаги 7-референдумда овоз берди.
Тошкент вилояти ҳокими Зоир Мирзаев Нурафшон шаҳрининг “Деҳқонобод” маҳалласида жойлашган 7-референдум участкасига турмуш ўртоғи билан бирга бориб, фуқаролик ҳуқуқидан фойдаланган ҳолда овоз бериш жараёнида иштирок этди.
Вилоят ҳокими овоз бериш жараёнларидан сўнг ОАВ вакилларини қизиқтирган саволларга жавоб берар экан, референдум узоқ кутилган жараён эканини, Ўзбекистонда биринчи маротаба янгиланган Конституция референдумида иштирок этаётганидан хурсандлигини таъкидлаб, янгиланаётган Конституция муаллиф ўзбекистонликлар эканини билдирди.
Овоз бериш жараёнларида якка ҳолда кўриниш берган Самарқанд вилояти ҳокими Эркинжон Турдимов Самарқанд шаҳридаги 42-умумий ўрта таълим мактабида жойлашган 144-референдум участкасида, Бухоро вилояти ҳокими Ботир Зарипов эса Бухоро шаҳридаги 49-референдум участкасида овоз бериб, фуқаролик ҳуқуқидан фойдаланди.
Сирдарё вилояти ҳокими Акмалжон Маҳмудалиев Гулистон шаҳридаги 15-референдум участкасида Конституциявий ўзгартишга муносабат билдирган бўлса, Фарғона вилояти ҳокими Хайрулло Бозоров Фарғона шаҳридаги 88-референдум участкасида ўз ҳуқуқидан фойдаланди.
Қашқадарё вилояти ҳокими Муроджон Азимов Қарши шаҳридаги 4-референдум участкасида, Жиззах вилояти ҳокими Эргаш Солиев Жиззах шаҳрининг “Тошлоқ” маҳалласидаги 39-референдум участкасида, Сурхондарё вилояти ҳокими Улуғбек Қосимов Термиз шаҳридаги 260-референдум участкасида, Андижон вилояти ҳокими Шуҳрат Абдураҳмонов эса Андижон шаҳридаги 30-умумтаълим мактабида жойлашган 51-референдум участкасида, Хоразм вилояти ҳокими Жўрабек Раҳимов эса Урганч шаҳридаги 28-референдум участкасида бўлиб, фуқаролик ҳуқуқидан фойдаланган ҳолда овоз бериш жараёнида фаол иштирок этди.
Тошкент шаҳар ҳокимлиги ахборот хизмати раҳбари Мукаррам Азимованинг «Дарё»га билдиришича, шаҳар ҳокими Шавкат Умурзоқов бугун 434-референдум участкасида бўлиб, фуқаролик ҳуқуқидан фойдаланган.
.jpg)
Тармоқларда ҳозирча, Навоий вилояти ҳокимларининг референдумда қатнашгани акс этган суратлар тарқалмади.
Изоҳ (0)