Sirdaryo viloyatiga hokim vazifasini bajaruvchi tayinlandi

Shavkat Mirziyoyevning tegishli farmoni bilan Akmal Mahmudaliyev zimmasiga Sirdaryo viloyati hokimi vazifasini bajarish yuklatildi. Bu haqda prezident matbuot kotibi Sherzod Asadov xabar bermoqda.

Ayni daqiqalarda bosh vazir Abdulla Aripov hamda Prezident administratsiyasi rahbari Sardor Umurzoqov ishtirokida Sirdaryo viloyatida bo‘lib o‘tayotgan yig‘ilishda mazkur farmon matni o‘qib eshittirilgan va yangi hokim jamoaga tanishtirilgan.

Akmal Mahmudaliyev ko‘p yillar davlat idoralarida mehnat qilib, katta tajriba to‘plagan. Vazirlar Mahkamasi mas’ul xodimi, Farg‘ona viloyatining Uchko‘prik tumani hokimi, Navoiy viloyati hokimining qishloq va suv xo‘jaligi masalalari bo‘yicha o‘rinbosari lavozimida ishlagan.

Sirdaryo viloyatining sobiq hokimi G‘ofurjon Mirzayev prezident maslahatchisi lavozimiga tayinlangan edi.