Хабарингиз бор, бугун, 30 апрель куни Ўзбекистонда катта тайёргалик кўрилган ва умумий бюджети 182 миллиард сўм бўлган референдум бўлиб ўтди. 2023 йилнинг 30 апрель куни соат 17:00 га қадар бўлган ҳисоб-китобларга кўра овоз бериш ҳуқуқига эга 19 миллиондан ортиқ ўзбекистонликларнинг 15 миллион 802 минг нафари, яъни 81,39 фоизи янгиланаётган Конституцияга нисбатан ўз хоҳиш-иродасини намоён қилди.
Жараёнда иштирок қилган президент Шавкат Мирзиёев ҳам фаол фуқаролик позициясини намоён қилиб, Тошкент шаҳрининг Мирзо Улуғбек туманидаги 59-референдум участкасига оилавий ташриф буюрди ва Ўзбекистон фуқароси сифатида овоз берди.
Тонгги соат 08:00 да бошланган жараёнда давлат амалдорлари, хусусан Президент Админстрацияси раҳбари Сардор Умрзоқов, Админстрация раҳбари ўринбосари Комил Алламжонов, президент матбуот котиби Шерзод Асадов ҳамда шўба мудири Саида Мирзиёевалар ҳам бошқаларга нисбатан фаол фуқаро эканини намоён қилиб, овоз беришни бошлаб юборди.
Референдум участкаларида кўриниш берган вилоят ҳокимларнинг энг чаққони бу — Самарқанд вилояти ҳокими Эркинжон Турдимов бўлди. Кўп ўтмай Бухоро вилояти ҳокими Ботир Зарипов Бухоро шаҳридаги 49-референдум участкасида фаол фуқаро сифатида намоён бўлиб, ҳуқуқидан фойдаланди. Сирдарё вилояти ҳокими Акмалжон Маҳмудалиев эса Гулистон шаҳридаги 15-референдум участкасига бориб, референдумда овоз беришда вилоят аҳлига намуна бўлди.
Тошкент вилояти ҳокими Зоир Мирзаев вилоятнинг Нурафшон шаҳридаги 7-референдум участкасига оилавий ташриф буюриб, нафақат овоз берди, Оммавий ахборот воситалари вакилларига пешвоз чиқиб, уларни қизиқтирган саволларга жавоб ҳам қайтарди.
“Референдум узоқ кутилган жараён, Ўзбекистонда биринчи маротаба янгиланган Конституция референдумида иштирок этаётганимиздан бахтиёрмиз”, — деди Зоир Мирзаев.
Бугунги референдумда шунингдек, энди оила қураётган келин-куёвлар, фарзандини дунёга келтирган ёш оналар, 128 ёшини яшаётган онахонлар ҳам иштирок этиб, жамиятдаги ўзгаришларга бефарқ эмаслигини кўрсатди.
Жумладан Сурхондарё вилоятининг Шеробод тумани “Боғиобод” маҳалласида жойлашган 107-референдум участкасида никоҳ тўйи бўлиб ўтаётган ёш келин-куёвлар — Фарруҳ Қулматов ҳамда Ҳайитгул Муҳаммадиевалар кўриниш бериб, ўз фуқаролик ҳуқуқларидан фойдаланган.
.jpg)
Қолаверса Қашқадарё вилоятининг Китоб туманида туғруқхонада фарзандини дунёга келтирган Мафтуна Жўрақулова ҳамда Мадина Жўраевалар туғуруқ бўлимида ётган бўлишига қарамасдан яратиб берилган имкониятдан фойдаланиб, референдумда овоз берди ва фуқаролик ҳуқуқидан фойдаланди.
Фарғона вилоятининг Бувайда туманида Ўзбекистондаги энг ёши улуғ инсон 128 ёшли Ҳувайдо момо Умарова ҳам референдумда овоз бериб, натижаларга ўз ҳиссасини қўшди.
Изоҳ (0)