Surxondaryo viloyati hokimi lavozimida ishlab kelgan Erkinjon Turdimov Samarqand viloyati hokimi etib tayinlandi. Bu haqda O‘zbekiston hukumatidagi manbaga tayanib, “Gazeta.uz” xabar berdi.
49 yoshli Turdimov 2016-yilning dekabr oyidan buyon Surxondaryo viloyati hokimi lavozimida ishlab kelayotgandi.
Bungacha u 1991-yildan 1995-yilgacha “O‘zsanoatqurilishbank”ning hududiy bo‘limlarida faoliyat ko‘rsatgan. 1995—1996-yillarda Zarafshon shahar hokimi o‘rinbosari, 1996-yildan 2000-yilgacha Tashqi iqtisodiy faoliyat Milliy bankining Navoiy bo‘limida boshqaruvchisi sifatida ishlagan. 2000-yildan 2008-yilgacha esa Xatirchi tumani hokimi bo‘lgan.
2008-yilda Qishloq va suv xo‘jaligi vazirining birinchi o‘rinbosari lavozimida faoliyat ko‘rsatgan Turdimov o‘sha yili Navoiy viloyat hokimi lavozimiga tayinlangandi. U Surxondaryo viloyati hokimi bo‘lguniga qadar Navoiyda faoliyat ko‘rsatgan.
Shu kungacha Samarqand viloyati hokimi sifatida ishlab kelgan Turobjon Jo‘rayev qaysi vazifaga o‘tgani hozircha ma’lum emas.
Izoh (0)