Ўзбекистонда 24 октябрь куни соат 08:00 дан президент сайлови бошланди. Бир қатор вилоят ҳокимлари ўзи муносиб деб топган номзодга овоз берди.
Хусусан, Андижон вилояти ҳокими Шуҳрат Абдураҳмонов Андижон шаҳри Иқтисодиёт ва қурилиш институтида ташкил этилган 35-сайлов участкасида рафиқаси Насиба Абдураҳмонова билан бирга президент сайловида иштирок этди. Самарқанд вилояти ҳокими Эркинжон Турдимов Самарқанд шаҳридаги 144-сайлов участкасида биринчилар қаторидан президент сайловида овоз берди.
Вилоят ҳокимлари, шунингдек, Бухоро вилояти ҳокими Ботир Зарипов Бухоро шаҳридаги 49-сайлов участкасида, Қашқадарё вилояти ҳокими Зоир Мирзаев Қарши шаҳридаги 4-сайлов участкасида, Сурхондарё вилояти ҳокими Тўра Боболов Термиз шаҳридаги 269-сайлов участкасида, Тошкент вилояти ҳокими Даврон Ҳидоятов Нурафшон шаҳридаги 10-сайлов участкасида, Хоразм вилояти ҳокими Фарҳод Эрманов Урганч шаҳридаги 28-сайлов участкасида, Фарғона вилояти ҳокими Хайрулло Бозоров Фарғона шаҳридаги 88-сайлов участкасида ўзи муносиб деб топган номзодга овоз берди.
Эслатиб ўтамиз, Ўзбекистонда президент сайловида Экологик партиядан Нарзулло Обломуродов, Халқ демократик партиясидан Мақсуда Ворисова, Либерал-демократик партиядан Шавкат Мирзиёев, «Миллий тикланиш» демократик партиясидан Алишер Қодиров ва «Адолат» социал-демократик партиясидан Баҳром Абдуҳалимов номзод сифатида иштирок этмоқда. Улар ҳам сайловда оила аъзолари билан иштирок этиб, ўзлари муносиб деб топган номзодга овоз берди.
Изоҳ (0)