Президент фармони билан Эркинжон Турдимов Сирдарё вилояти ҳокими вазифасини бажарувчи этиб тайинланганди. У тайинлов ўқиб эшиттирилган Халқ депутатлари Сирдарё вилояти кенгашининг навбатдан ташқари сессиясида чиқиш қилиб, Сирдарёни ривожлантириш ҳақида гапирди.
“Сирдарёнинг одамларини рози қилиш, ижтимоий объектларни ривожлантириш, энг асосийси камбағалликдан чиқариш бўйича ўзимнинг билимимни, тажрибамни, керак бўлса борлиғимни сарфлаб, мана шу ишга ёндашаман”, деди Эркинжон Турдимов.
“Сирдарё” телеканали эфирида маълум қилинишича, сессияни Халқ депутатлари вилоят кенгаши раиси Покиза Аҳмеджонова олиб борди. Унда бош вазир Абдулла Арипов ҳам иштирок этди. Танқидий руҳда бўлиб ўтган сессияда Ўзбекистонда олиб борилаётган ислоҳотлар, вилоятни иқтисодий-ижтимоий ривожлантиришга имкониятлар яратилганига қарамасдан, ҳудудда сўнгги икки йил ичида йўл қўйилган камчиликлар муҳокама қилинди.
-hmpAM-79.jpg)
-ytB6g0g_.jpg)
Шундан сўнг йиғилишда ҳукумат аъзолари, маҳаллий ижро ҳокимияти вакиллари ҳамда депутатлар билан ҳамкорликда вилоятда қишлоқ хўжалиги иқтисодиётини ривожлантириш, инвестиция ва тадбиркорлик муҳитини яхшилаш, аҳолининг ижтимоий шароитларини ошириш ва бошқа йўналишларда қўшимча вазифалар белгиланди.
2018 йил июлдан буён Самарқанд вилояти ҳокими лавозимида ишлаб келган Эркинжон Турдимов бошқа ишга ўтиши муносабати билан 2024 йилнинг ноябрида Самарқанд вилояти ҳокими лавозимидан озод этилганди. Сирдарё вилоятининг аввалги ҳокими Акмалжон Маҳмудалиев 2025 йил 16 январь куни президент раислигида бўлиб ўтган йиғилишда лавозимидан озод этилганди. Бунга ҳудудида инвестицияларни жалб қилиш, қишлоқ хўжалигини ривожлантириш ва бошқа йўналишлардаги фаолиятда жиддий камчиликларга йўл қўйгани сабаб бўлди.
Изоҳ (0)