Президенти фармони билан Эркинжон Турдимов Сирдарё вилояти ҳокими вазифасини бажарувчи этиб тайинланди. Бу ҳақда давлат раҳбари матбуот котиби хабар берди.
Эркинжон Турдимов бошқа ишга ўтиши муносабати билан 2024 йилнинг ноябрида Самарқанд вилояти ҳокими лавозимидан озод этилганди. Пезидентнинг тегишли фармони билан Ҳисоб палатаси раиси лавозимида ишлаб келган Адиз Бобоев Самарқанд вилояти ҳокими вазифасини бажарувчи этиб тайинланганди.
Сирдарё вилоятининг аввалги ҳокими Акмалжон Маҳмудалиев 2025 йил 16 январь куни лавозимидан озод этилганди. Бунга ҳудудида инвестицияларни жалб қилиш, қишлоқ хўжалигини ривожлантириш ва бошқа йўналишлардаги фаолиятда жиддий камчиликларга йўл қўйгани сабаб бўлди.
Эркинжон Турдимов ҳақида
2024 йил 5 ноябрь куни Эркинжон Турдимов Самарқанд вилояти ҳокими лавозимига қайта тасдиқланганди. У 2018 йил июлдан бери Самарқанд вилояти ҳокими лавозимида ишлаб келади.
У 55 ёшда, 1969 йилда Самарқанд вилоятида туғилган. 1991—1995 йилларда “Ўзсаноатқурилишбанк” ҳудудий бўлимларига раҳбарлик қилган, 1996 йилгача Зарафшон ҳокими ўринбосари лавозимида фаолият кўрсатган. 1996 йилдан 2000 йилгача Ташқи иқтисодий фаолият Миллий банкининг Навоий бўлимида бошқарувчиси сифатида ишлаган. 2000 йилдан 2008 йилгача Хатирчи тумани ҳокими бўлган. 2008—2016 йилларда Навоий вилояти ҳокими лавозимида ишлаган.
2016 йил декабридан Самарқанд вилоятига ҳоким бўлгунча Сурхондарё вилоятини бошқариб келган.
Турдимов 2006 йилда “Меҳнат шуҳрати” ордени билан, 2024 йил 24 августда Фидокорона хизматлари учун ордени билан мукофотланган.
Изоҳ (0)