12 август куни Халқ депутатлари Пайариқ тумани кенгашининг навбатдан ташқари сессияси ўтказилди, деб хабар беради Самарқанд вилояти ҳокимлиги матбуот хизмати.
Маълум қилинишича, Самарқанд вилояти ҳокими Эркинжон Турдимов қатнашган сессияда ташкилий масала кўрилган.
Сессияда Пайариқ туманига 2019 йилдан буён раҳбарлик қилиб келаётган Дилшод Мусинов ўз аризасига кўра лавозимидан озод этилган.
Шу пайтгача Самарқанд вилояти қишлоқ хўжалиги бошқармаси бошлиғи вазифасида ишлаб келган Зафар Эргашев Пайариқ тумани ҳокими этиб тасдиқланган. Шунингдек, ҳокимлик матбуот хизматининг хабар беришича, сессияда туманга янги прокурор, ИИБ бошлиғи ҳамда Давлат солиқ инспекцияси раҳбари тайинланган.
Эслатиб ўтамиз, 2020 йилнинг октябрида Пайариқ тумани ҳокими Дилшод Мусинов туман республикадаги 33 та «қониқарсиз» ҳудуд сафидан жой олгани учун энг биринчи навбатда ўзи айбдор эканлигини айтиб, туман аҳолисидан узр сўраганди.
Аввалроқ Бухоро вилояти давлат солиқ бошқармаси бошлиғи Ғиждувон тумани ҳокими этиб тайинлангани, Гулистон туманида «тўртлик» алмашгани ва товар-хом ашё биржаси Сирдарё вилояти филиали директори Гулистон ҳокими этиб тайинлангани тўғрисида хабар берилганди.
Изоҳ (0)