Тошкент вилояти Пискент туманида тунда ноқонуний қум-шағал қазиб олаёт фуқаролар қўлга тушди.
Вилояти Экология, атроф-муҳитни муҳофаза қилиш ва иқлим ўзгариши бошқармасининг хабар беришича, ҳолат Ички Ишлар бошқармаси пост-патрул хизмати ходимлари билан биргаликда ўтказилган рейд давомида аниқланган.
Фуқаролар Пискент тумани ҳудудидан оқиб ўтувчи Оҳангарон дарёсининг эски ўзани бўйида юклагич ёрдамида қум-шағал аралашмалари Ҳоwо русумли юк машинасига ортаётган бўлган.
Мазкур ҳолат юзасидан табиатга 3 696 204 960 сўм (уч миллиард олти юз тўқсон олти миллион икки юз тўрт минг тўққиз юз олтмиш) зарар етказилгани аниқланди ва автотранспорт воситалари Пискент туманида жойлашган жарима майдонига жойлаштирилди.
Ҳолат юзасидан тўпланган ҳужжатларга ҳуқуқий баҳо бериш учун прокуратура органига юборилган.
Дарёлар ўзанларидаги норуда материалларни қазиб олишга муддатсиз мораторий жорий этилган
Президент фармони билан Чирчиқ, Сангзор, Зарафшон, Норин, Қашқадарё, Сурхондарё ва Сирдарё дарёлари ўзанларидаги норуда материалларни қазиб олишга 2024 йил 1 майдан муддатсиз мораторий жорий қилинди. Ноқонуний қазиб олиш ишлари натижасида табиатга етказилган зарар учун жавобгарлик ҳам кучайтирилди.
Шунга қарамай, ноқонуний қум-шағал қазиб олиш давом этмоқда. 12 февраль куни Сурхондарё ва Тошкент вилоятларида табиий қум хом ашёсини ўзбошимчалик билан қазиб олиш ҳолатлари фош этилди. Тошкент вилояти Бекобод туманида ноқонуний равишда қум қазиб олиниши оқибатида табиатга 100 миллиард сўмдан ортиқ зарар етказилди.
13 январда Самарқанднинг икки ҳудудида қум-шағал қазиб олиниши оқибатида табиатга 826 миллиард сўм зарар етказилганди.
Изоҳ (0)