АҚШнинг 14 та штатидан прокурор ва расмийлар президент Дональд Трамп ва Ҳукумат самарадорлиги департаменти (DOGE) раҳбари Илон Маскни судга берганди. Улар Маскга берилган кенг ваколатлардан норозилик билдирган. Оқ уй бунга жавобан миллиардернинг ҳукуматдаги ролини тушунтирди.
Оқ уйнинг суд маълумотномасига кўра, Илон Маск Ҳукумат самарадорлиги департаменти ходими эмас. Миллиардер президент маслаҳатчиси бўлиб ишлайди.
Оқ уйнинг бошқа катта маслаҳатчилари сингари, Маск ҳам ҳукумат қарорларини мустақил равишда қабул қилиш учун расмий ваколатларга эга эмас. У фақат президентга маслаҳат бериши ва унинг кўрсатмаларини етказиши мумкин, дейилади маълумотномада.
Оқ уй суд жараёнларида Маскнинг роли ҳақида маълумот беришга мажбур бўлди, чунки DOGE қарорлари кўплаб даъволарга сабаб бўлди. Мазкур департамент федерал хизматчиларни кенг миқёсда қисқартирди ва Конгресс томонидан маъқулланган харажатларни тўхтатди. Кўпчилик буни Маскка берилган “назоратдан ташқари ваколатлар” натижаси деб атади.
Аризонадан Вашингтонгача бўлган 14 та штат Маск, DOGE ва Трампга қарши даъво қўзғатди. Улар Маск ўз ваколатларини суиистеъмол қилаётгани ва “фақат тайинланган, Қўшма Штатларнинг олий мансабдор шахсигина амалга ошириши мумкин бўлган ҳаракатлар”ни содир этаётганини билдирди.
Ҳеч ким томонидан сайланмаган битта шахс қўлида давлат ҳокимиятининг тўпланишидан кўра демократияга каттароқ таҳдид йўқ, дея таъкидланади даъво аризасида.
Судья 18 февраль куни куни штатларнинг Маск ва DOGE'нинг маълумотларга киришини вақтинчалик тақиқлаш ва давлат хизматчиларини ишдан бўшатишни тўхтатиб туриш тўғрисидаги талабини рад этди.
Изоҳ (0)