АҚШ Марказий разведка бошқармаси (МРБ) раҳбарияти ўз ходимларига имтиёзлар ва саккиз ойлик маош олиш шарти билан ишдан бўшашни таклиф қилди. Бу ҳақда The Wall Street Journal хабар берди.
Амалдорларнинг сўзларига кўра, бу идорани президент Дональд Трампнинг устувор йўналишларига, жумладан, Мексика наркокартелларига қарши кураш ва Хитойга қарши туришга мослаштиришга уриниш ҳисобланади. Январь ойи охирида худди шундай таклиф федерал даражадаги давлат хизматчиларига ҳам келиб тушганди. МРБ, эҳтимол, ушбу ташаббусни қўллаган биринчи разведка идораси бўлиши мумкин.
Разведка директори Жон Ретклифф ёрдамчисига кўра, бошқарма янги ходимларни ишга олишни тўхтатмоқда, гарчи уларнинг баъзилари иш учун дастлабки таклифларни олган бўлса ҳам.
“Номзодлар МРБнинг янги мақсадларига мос тажрибага эга бўлмаса, уларнинг бир қисми лавозимидан кетиши мумкин. Директор Ретклифф разведка ходимларининг президент администрация миллий хавфсизлик соҳасидаги устувор йўналишларига мувофиқ келишини таъминлаш учун тезкор чоралар кўрмоқда”, дейди у.
Хизмат вакиллари бу қадамни “идорага янги куч-ғайрат бағишлашга” қаратилган стратегиянинг таркибий қисми деб баҳоламоқда.
♦ Трампнинг инаугурациясидан сўнг АҚШ президенти администрациясида миллиардер Илон Маск бошчилигидаги Давлат самарадорлиги департаменти (DOGЕ) иш бошлади. Ушбу тузилма ортиқча меъёрий ҳужжатларни йўқ қилиш, амалдорлар ва харажатларни қисқартиришга эътибор қаратиши айтилганди.
♦ The Wall Street Journal маълумотларига кўра, Трамп администрацияси компенсация эвазига ишдан бўшатиш таклифи ҳозирча давлат хизматчилари орасида катта қизиқиш уйғотмаган.
АҚШ ҳукуматининг 20 мингдан ортиқ федерал амалдорлари (давлат хизматчиларининг тахминан 1 фоизи) ўз лавозимларини тарк этишга рози, деб ёзади Bloomberg.
Изоҳ (0)