Tesla ва SpaceX раҳбари Илон Маск Twitter сохта аккаунтлар ва спам-ботлар ҳақида маълумот тақдим этмагани учун, уни сотиб олиш ҳақидаги битимдан воз кечди. Бу ҳақда Reuters миллиардернинг адвокатига таяниб хабар бермоқда.
Twitter спам-аккаунтлар ва қалбаки ҳисоб ёзувлари ҳақида маълумотлар тақдим этиш бўйича «кўпсонли сўровларга жавоб бера олмади ёки жавоб беришдан бош тортди», дея маълум қилди Маскнинг вакиллари. Улар Twitter’ни Tesla ва SpaceX раҳбари билан келишувнинг бир нечта низомларини бузишда айблади.
Twitter акциялари савдолар чоғида 7 фоизга тушиб кетди.
Twitter директорлар кенгаши раиси Брет Тэйлор ижтимоий тармоқ судга даъво беришини маълум қилди.
Битим шартларига мувофиқ, агар олди-сотди амалга ошмаса, Маск 1 миллиард доллар миқдорида жарима тўлаши керак бўлади.
Дунёнинг энг бой одами (унинг бойлиги Forbes маълумотлари бўйича 2022 йил апрели ҳолатига 219 миллиард долларни ташкил қилади) Маск апрель ойида ижтимоий тармоқни 44 миллиард долларга сотиб олмоқчи эди. Аммо кейинроқ сохта ва спам-аккаунтлар Twitter умумий фойдаланувчилари сонининг 5 фоиздан камроғини ташкил этиши ҳақидаги маълумотлар тасдиқлангунига қадар олти-сотди битимини тўхтатиб қўйди.
Миллиардер ва Twitter ўртасидаги битим жиддий хавф остида тургани ҳақида 7 июль куни The Washington Post манбаларига таяниб маълум қилган эди. Маскнинг вакиллари Twitter’нинг сохта ва спам-аккаунтлар ҳақидаги маълумотларини текшириб бўлмайди, Twitter’нинг бизнес сифатидаги истиқболларини баҳолаш учун ахборот эса етарли эмас, деган хулосага келган.
Апрель бошида Маск дастлаб Twitter’нинг 9,2 фоиз улушини сотиб олди ва энг йирик акциядорлардан бирига айланди, кейинроқ эса ижтимоий тармоқни сотиб олиш ниятини маълум қилди ва битта акция учун 54,20 доллардан таклиф қилди.
Reuters агентлиги Twitter’нинг 2 майдаги ҳисоботига таяниб, қалбаки аккаунтлар ва спам-ботлар кундалик фаол фойдаланувчиларнинг кўпи билан 5 фоизини ташкил этишини маълум қилганди.
Бироқ тадбиркор буни ўзи текшириб кўришга қарор қилди. 100 та тасодифий ҳисоб ёзувларини танлаб олиб, у фейк аккаунтлар барча фойдаланувчиларнинг камида 20 фоизини ташкил этади, деган хулосага келди.
Изоҳ (0)