АҚШда ҳукумат самарадорлиги департаменти (DOGE) раҳбари Илон Маск иш кўплигидан Оқ уйда тунаб қолаётгани маълум қилинди. Бу ҳақда манбаларга таяниб, People хабар берди.
Унинг офиси Оқ уй ҳудудидаги Эйзенхауэр ижроия офиси биносида жойлашган. Маск кейинги тўрт ойни департаментда фаолият юритишга сарфламоқчи. У АҚШ бюджетини 2 триллион долларга қисқартириб, бу орқали инфляцияни 2 фоизга туширишни режалаштирган. Маск амалдорлар ўртасидаги қисқартиришлар баъзи америкаликлар учун “вақтинчалик қийинчиликлар”га олиб келишини тан олганди.
Иш ҳажми туфайли 53 ёшли миллиардер офисда тунаб, диванда, баъзан эса полда ухлай бошлади, дейди тадбиркорнинг атрофидаги икки манба.
Маск агар ҳукумат мамлакатнинг давлат қарзи бўйича сиёсатини ўзгартирмаса, АҚШ амалда банкрот бўлиши мумкинлигини айтганди. У АҚШнинг НАТОдаги иттифоқчилари мудофаасига сарфлаётган харажатларини ҳам кескин танқид қилган.
Нима учун америкалик солиқ тўловчилар Европанинг мудофаа харажатларининг тўртдан бир қисмини молиялаштириши керак? Бу ақлга сиғмайди, айниқса, бизда жуда катта бюджет тақчиллиги ва қарзнинг ҳаддан ташқари ўсиши мавжуд бўлган бир пайтда, деган у.
Маск, шунингдек, оммавий ахборот воситаларига сарфланаётган маблағларни “солиқ тўловчилар пулларидан самарасиз фойдаланиш” деб баҳолаган.
11 февраль куни Маск ўғли билан Оқ уйдаги матбуот анжуманига келди, отаси ва Трамп журналистларнинг ҳукуматдаги қисқартиришлар ҳақидаги саволларига жавоб бераётганда, у юзини буриштирди, деб ёзади ABC News. Ҳозирда Маскнинг ўғли ҳам Оқ уйда тунаб қолаётгани ёки йўқлиги номаълум.
Изоҳ (0)