Дунёнинг энг бой одами Илон Маск унга тегишли электромобил ишлаб чиқарувчи Tesla компанияси акциялари нархининг икки кунлик пасайиши фонида 50 миллиард доллар йўқотди. Бу ҳақда Bloomberg хабар берди.
Tesla қимматли қоғозларининг нархи Маск Twitter’да сўровнома ўтказганидан кейин туша бошлади. Миллиардер ўз обуначиларидан компания акцияларининг 10 фоизини сотиши керакми ёки йўқлигини сўраган ва ҳар қандай ҳолатда овоз бериш натижаларига риоя қилишга ваъда берган. Респондентларнинг деярли 58 фоизи акцияларни сотиш учун овоз берган.
Бундан ташқари, акциялар нархининг пасайишига тадбиркорнинг укаси Кимбал Маскнинг Tesla қимматли қоғозларидаги ўз улушини 100 миллион доллардан кўпроққа сотгани ҳақидаги хабарлар ҳамда Илон Маскнинг ўзи ҳам шахсий қарзларини қоплаш учун улушини сотмоқчилиги ҳақидаги миш-мишлар таъсир кўрсатди.
Илон Маскнинг йўқотишлари Bloomberg Billionaires Index тарихида бойликнинг икки кунлик энг йирик пасайиши бўлди. Индексга кўра, ҳозир Tesla асосчисининг бойлиги 288 миллиард долларга етади. Forbes Real Time Маскнинг бойлигини 271 миллиард долларга баҳоламоқда. Ноябрь ойи бошида бу миқдор 300 миллиард доллардан ошганди.
Bloomberg таъкидлашича, Маск ҳамон дунёдаги энг бой одам бўлиб қолмоқда, бироқ у ва миллиардерлар рўйхатида иккинчи ўринда турган Amazon асосчиси Жефф Безос ўртасидаги тафовут 83 миллиард долларгача қисқарган.
Изоҳ (0)