Украина президенти Владимир Зеленский АҚШнинг Украина фойдали қазилмаларига кириши тўғрисидаги шартнома ҳақида “бизни ва манфаатларимизни ҳимоя қилмайди” деди. У бу ҳақда Мюнхен хавфсизлик конференциясида журналистлар билан суҳбатда айтиб ўтди.
Зеленскийнинг таъкидлашича, у вазирларга мазкур ҳужжатни имзоламасликни буюрган, чунки сифати уни қониқтирмаган.
“Менимча, у ҳали тайёр эмас. У бизни ва манфаатларимизни ҳимоя қилмайди. Украинага инвестициялар ҳақида гапириш мен учун жуда муҳим. Бу юридик жиҳатдан тўғри тузилиши керак. Агар барча масалалар ушбу хавфсизлик кафолатлари билан боғлиқ бўлса, бундан келадиган фойда қандай тақсимланиши ҳақида ўйлаш мумкин. Аммо ҳозирча ҳужжатда бу боғлиқликни кўрмаяпман”, деди у.
Президент аниқлик киритишича, АҚШнинг фойдали қазилмаларга кириши бўйича келишув Украина учун хавфсизлик кафолатлари билан боғлиқ бўлиши керак эди.
Зеленский Украина минерал ресурсларининг 50 фоизига бўлган ҳуқуқларни АҚШга бермоқчи эмас
Украина президенти тегишли келишувни имзолашдан бош тортди. У, шунингдек, АҚШ вакиллари билан Украина конституциясига мувофиқ тайёрланган тоғ-кон бўйича келишув бўйича ўз таклифини муҳокама қилди.
АҚШ сенатори Брайан Шац Украина президенти билан учрашувдан сўнг Трампнинг таклифини “яхшилаш зарурлигини” айтди, бироқ тафсилотлар ҳақида гапиришдан бош тортди. У, Зеленскийнинг “келишувнинг бир томонламалиги ҳақидаги даъволари адолатли” эканини таъкидлади.
Хавфсизлик кафолатлари эвазига Украина ресурсларидан фойдаланиш
Трампнинг сўзларига кўра, у Зеленский билан Россия билан бўлажак тинчлик шартномасида хавфсизлик кафолатлари эвазига америкалик инвесторларга Украинадаги нодир металлар конлари ва газ конларига кириш ҳуқуқини бериш бўйича 500 миллион долларлик келишув тузмоқчи.
Ғарбга Украинада фойдали қазилмаларни қазиб олиш ҳуқуқини бериш ҳақида Зеленский 2024 йил кузида АҚШ президентлигига ўша пайтдаги номзодлар Дональд Трамп ва Камала Ҳаррисга тақдим этган “ғалаба режаси”да ҳам айтилган.
3 февраль куни Трамп бу вариант ҳақида яна гапира бошлади, бу Ғарб сиёсатчилари ва оммавий ахборот воситаларида катта шов-шувга сабаб бўлди. 7 февраль куни Зеленский Reuters агентлигига берган интервьюсида АҚШ Украина табиий ресурсларини ўзлаштиришда устуворликка эга бўлишини, чунки “америкаликлар ҳаммадан кўпроқ ёрдам берганини” айтди.
Изоҳ (0)