Аввалроқ Покистон бош вазири Шаҳбоз Шариф 25 февраль куни расмий ташриф билан Ўзбекистонга келгани ҳақида хабар берилганди. Шаҳбоз Шариф Абдулла Арипов ҳамроҳлигида “Янги Ўзбекистон” боғида бўлди ва Мустақиллик монументи пойига гул қўйди.

Меҳмонга мажмуанинг меъморий ечимлари ҳамда композициясининг мазмун-моҳияти ва хусусиятлари ҳақида атрофлича маълумот берилди. Мажмуа Покистон делегациясида чуқур таассурот қолдирди.

Маълумот учун, Ўзбекистонга ташриф буюраётган мартабали меҳмонларнинг президент Шавкат Мирзиёев ташаббуси билан барпо этилган мазкур муҳташам мажмуа билан танишуви анъанага айланган.

Ташрифдан мақсад нима?
Шаҳбоз Шариф президент Шавкат Мирзиёевнинг таклифига биноан ташриф буюрди. Бўлажак олий даражадаги музокаралар кун тартибидан Ўзбекистон—Покистон стратегик шериклик ва кўп қиррали ҳамкорлик муносабатларини янада ривожлантириш ва кенгайтириш масалалари ўрин олган.
Ўзаро товар айирбошлаш ҳажмини ошириш, транспорт боғлиқлигини кучайтириш ва транзит салоҳиятини рўёбга чиқариш, енгил ва чарм саноати, қишлоқ хўжалиги, фармацевтика, электротехника ва иқтисодиётнинг бошқа тармоқларида кооперация лойиҳаларини илгари суриш борасидаги қўшма режалар диққат марказида бўлади. Маданий-гуманитар ва туризм алоқаларини фаоллаштириш масалалари ҳам кўриб чиқилади. Халқаро ва минтақавий аҳамиятга молик долзарб масалалар юзасидан фикр алмашилади.
Саммит якунида қўшма декларация ва қатор икки томонлама ҳужжатлар қабул қилиниши режалаштирилган.
Ташрифнинг ишбилармонлик дастури доирасида етакчилар Ўзбекистон—Покистон қўшма бизнес форумида ҳам иштирок этади.
Ўзбекистон—Покистон муносабатлари
Покистон – Ўзбекистон мустақиллигини биринчилардан бўлиб, 1991 йилнинг 20 декабрида тан олган. Ўзаро дипломатик муносабатлар эса 1992 йил 10 майдан бошлаб ўрнатилган. Икки давлат ўртасидаги иқтисодий алоқалар кейинги йилларда янги босқичга кўтарилди. 2019 йилдаги 122 млн долларлик савдо айланмаси 2023 йилга келиб 387 млн долларга етди.
Статистика агентлиги маълумотларига кўра, 2024 йилда Ўзбекистон Покистонга 124,7 минг тонна мева-сабзавот маҳсулотлари экспорт қилган. Бу маҳсулотларнинг умумий қиймати 192,3 млн долларни ташкил этди. Шу билан бирга, Покистон 2024 йилнинг Ўзбекистон экспорт бозоридаги энг муҳим шериклардан бирига айланиб, савдо ҳажми 300 миллион долларга етди.
Изоҳ (0)