Шанхай ҳамкорлик ташкилоти саммитининг биринчи куни доирасида 15 сентябрь куни қатор тадбирлар бўлиб ўтди. «Дарё» нашри кун давомида содир бўлган эътиборга молик жараёнларни бир жойга тўплади.
Эрта тонгдан хорижий давлат раҳбарлари бирин-кетин Самарқанд шаҳрига кела бошлади. Тожикистон, Туркманистон, Россия, Озарбайжон, Беларусь, Туркия ҳамда Қозоғистон президентлари, шунингдек, Покистон ва Ҳиндистон бош вазирлари Самарқандга етиб келди.
Кун давомида Ўзбекистон президенти Шавкат Мирзиёев қатор давлат раҳбарлари билан учрашув ўтказди. Жумладан, дастлаб Самарқанддаги Конгресс марказида Хитой раиси Си Цзиньпинни расмий кутиб олиш маросими бўлиб ўтди. Шавкат Мирзиёев Си Цзиньпинни «Дўстлик» ордени билан мукофотлади.
Шавкат Мирзиёев ва Си Цзиньпин қўшма баёнот имзолади. Шунингдек, олий даражадаги ташриф доирасида 15 та ҳужжат имзоланди.
Бундан ташқари, Ўзбекистон президенти Покистон бош вазири Шаҳбоз Шариф, Озарбайжон президенти Илҳом Алиев, Тожикистон президенти Эмомали Раҳмон, Беларусь президенти Александр Лукашенко, Туркманистон президенти Сердар Бердимуҳамедов, Қирғизистон президенти Садир Жапаров ҳамда Россия президенти Владимир Путин билан музокаралар ўтказди.
Шунингдек, Эроннинг ШҲТга аъзо давлат мақомини олиш учун мажбуриятлари тўғрисидаги меморандум имзоланди.
Беларусь президенти Александр Лукашенко ШҲТ бош котиби Чжан Мин билан учрашув ўтказиб, Беларусь Шанхай оиласининг тўлақонли аъзосига айланиш вақти келганини айтди.
Хитой—Мўғулистон—Россия мамлакатлари ўртасида уч томонлама мулоқот бўлиб ўтди.
Саммит ўзи ишини эртага — 16 сентябрь куни давом эттиради.
Изоҳ (0)