Покистонда қуролли шахслар 60 дан ортиқ одамни отиб ўлдирди

Покистоннинг Балужистон вилоятидаги трассада содир этилган қуролли ҳужумда камида 60 киши ҳалок бўлди.

Покистон ОАВга кўра, қуролланган шахслар кечаси Мусахайл округининг Рарашам ҳудудида йўлни тўсиб қўйган, йўловчиларни автобус ва юк машиналаридан тушириб, ҳужжатларини текширган ва кейин уларга қарата ўқ узган.

Шунингдек, жангарилар камида ўнта машинага ўт қўйган. Қайд этилишича, қурбонлар панжоблик йўловчилар бўлган.

Воқеа содир бўлган ҳудудга полиция ва тез ёрдам машиналари етиб келган, ярадорлар ва ҳалок бўлганларнинг жасадлари яқин атрофдаги шифохоналарга етказилган.

Покистон президенти Осиф Али Зардорий ва бош вазир Шаҳбоз Шариф ҳужумни қоралаб, Покистон ҳукумати терроризмга қарши курашишда қатъий эканини таъкидлаган. Шариф террорчилар муносиб жазоланишига ишонтирган.

Балужистон бош вазири Сарфараз Бугти ҳам тинч аҳолига уюштирилган терактни қоралаб, жангарилар қўлга олинишини айтган.

Сўнгги йилларда Покистонда террор ҳужумлари тез-тез содир бўлмоқда. Ҳужумлар кўпинча Афғонистон билан чегарадош Хайбер-Пахтунхва ва Балужистон вилоятларида кузатилади.

Исломобод покистонлик “Толибон” Афғонистондан ҳужумлар уюштираётганини даъво қилмоқда. Кобул бу айбловларни рад этган.

Ҳужумлар, шунингдек, Балужистон вилоятининг Покистондан ажралиб чиқиб, балужлар назоратига ўтишини талаб қилаётган Балужистон озодлик армияси (БОА) томонидан амалга оширилаётгани қайд этилган.