Ўзбекистон Ташқи ишлар вазирлиги АҚШда ноқонуний бўлиб турган фуқароларни ватанга хавфсиз депортация қилишда Америка тегишли ҳуқуқ-тартибот идоралари билан яқиндан ҳамкорлик қилиб келмоқда. Бу ҳақда ташқи ишлар вазири матбуот котиби Аҳрор Бурҳонов маълум қилди.
Унинг билдиришича, Ўзбекистоннинг Вашингтондаги элчихонаси ва мамлакатнинг Нью Йоркдаги Бош консулхонаси узоқ йиллардан буён Ўзбекистон фуқароларининг ўз ватанларига хавфсиз депортациясини таъминлаш мақсадида АҚШнинг тегишли ҳуқуқ-тартибот идоралари билан яқиндан ҳамкорлик қилиб келмоқда. Ўзаро келишувларга асосан, Америка томони депортация қилинадиган фуқароларининг ҳар бир ҳолати ҳақида тезкорлик билан хабардор қилади. Ўрнатилган амалиётга кўра, фуқаролар ватанга Нью Йорк-Тошкент йўналиши орқали қайтади.
“ОАВда Ўзбекистон фуқароларининг бошқа давлатларга депортация қилиниши мумкинлиги ҳақидаги маълумотларни кузатиб боряпмиз. Ушбу масала юзасидан дипломатик ваколатхоналаримиз Америка томонидан бошқа давлатларга депортация қилиниши мумкинлиги ҳақида маълумот беришни сўраб мурожаат қилди. Бундан ташқари, бу борада Лотин Америкаси давлатлари билан дипломатик каналлар орқали ҳам алоқалар ўрнатилган”, деди матбуот котиби.
The New York Timesънинг Коста Рика президенти маъмуриятига таяниб маълум қилишича, Коста-Рика Ўзбекистон, Қозоғистон, Қирғизистон, Покистон ва Ҳиндистон каби давлатларнинг АҚШдан депортация қилинган 200 нафар фуқаросини қабул қилишга рози бўлди.
“Дипломатик ваколатхоналаримиз Ўзбекистоннинг барча фуқароларига, улар қаерда бўлишидан қатъий назар, ҳар томонлама ёрдам кўрсатади”, дея вазиятга изоҳ берган Аҳрор Бурҳонов “Дунё” ахборот агентлига берган интервьюсида.
АҚШ 970 дан ортиқ Ўзбекистон фуқаросини депортация қилади
Депортация қилинадиган Ўзбекистон фуқаролари сони 975 кишини ташкил этмоқда. Иммиграция ва божхона хизмати 2024 йил ноябрь ойидаги ҳисоботни тадқим этди. Умумий ҳисобда, турли давлатлардан 1 445 549 нафар чет эл фуқароси чиқариб юборилади. Улар ҳибсга олинмаган, бироқ депортация қилиш бўйича якуний қарор қабул қилинган. Рўйхатда Марказий Осиё давлатлари орасида Қозоғистон (369), Қирғизистон (319), Тожикистон (149) ва Туркманистон (40) фуқаролари ҳам бор.
Изоҳ (0)