Покистон армияси 11 июнь куни аксилтеррор операция ўтказиб, 11 нафар жангарини йўқ қилди. Бу ҳақда Arab News манбаси хабар берди.
Махсус операция армия хавфсизлик кучлари томонидан Покистон шимоли-ғарбидаги ҳудудда ўтган ҳафтада етти нафар аскарнинг ўлимига сабаб бўлган портлашга жавобан амалга оширилган. Хавфсизлик кучлари олдиндан тўпланган маълумотлар асосида белгиланган нуқталарга ҳужумлар уюштирган.
Олдинроқ Покистоннинг шимоли-ғарбидаги Лакки Марват туманида ҳарбий юк машинаси қўлбола портловчи қурол ёрдамида портлатилгани хабар қилинган эди. Ҳужум оқибатида бир нафар армия капитани ва олти нафар аскар ҳалок бўлган.
Бош вазир Шаҳбоз Шариф 10 июнь куни Чуниан шаҳрида армия капитанининг дафн маросимида қатнашган. У дафн маросимида мамлакатдан терроризмни йўқотишга ваъда берган.
“Хавфсизлик кучлари терроризм таҳдидини мамлакатдан йўқ қилишга қарор қилгани учун ҳудудда топилган бошқа ҳар қандай террорчини йўқ қилиш учун дезинфекция операцияси олиб борилмоқда”, — дейилган армия матбуот хизмати баёнотида.
Операция давомида бир қанча террорчилар бошпаналари ҳам йўқ қилинган. Шаҳбоз Шариф ўз идораси томонидан тарқатилган баёнотда Покистон хавфсизлик кучларини муваффақиятли операция ўтказгани учун олқишлаган.
Операция Покистоннинг Афғонистон билан чегарадош шимоли-ғарбий Хайбер-Пахтунхва вилоятида олиб борилган. Исломобод ҳукуматининг Кобул билан алоқалари ёмонлашуви ортидан сўнгги ойларда ушбу вилоятда терроризм ва зўравонлик тўлқини кучайган. Полиция, хавфсизлик кучлари ва тинч аҳолига бир неча бор ҳужумлар содир этилган.
Изоҳ (0)