Покистоннинг Балужистон вилоятида йўловчи автобуси 29 май куни жарликка қулаши оқибатида камида 28 нафар фуқаро ҳалок бўлди. Бу ҳақда Al Jazeera нашри хабар берди.
Ҳалокатга учраган автобус Балужистон жанубидаги Турбат шаҳридан вилоят маркази бўлган Кветта шаҳри томон кетаётган бўлган. Транспорт номаълум сабабга кўра йўлдан чиқиб кетиб, жарликка қулаган.
Ҳалокат содир бўлган Вашук туманидаги соғлиқни сақлаш ходими Нуруллоҳ Эссазай 28 киши ҳалок бўлганини тасдиқлаган. Автобусда жами 54 нафар йўловчи бўлгани қўшимча қилинган.
Ҳалокатдан омон қолганларнинг баъзилари оғир жароҳат олган. Улар маҳаллий шифохонада даволанаётгани хабар қилинган.
“Бизда саккиздан ўн нафаргача оғир жароҳат олган беморлар бор ва уларни вертолётда Кветтага жўнатиш учун тайёргарлик кўрмоқдамиз. Бошқа беморлар эса Хуздардаги касалхонага юборилади”, — дея маълумот берган Нуруллоҳ Эссазай.
Вашукдаги ҳукумат расмийларидан бири бўлган Муҳаммад Исмоилнинг айтишича, автобус кўприкдан ўтиб, тошлоқ жарликка қулаган. Ҳалок бўлганлар орасида автобус ҳайдовчиси ҳам бор. Воқеа жойи тоғли ҳудуд бўлгани боис қутқарувчилар воқеа жойига бориши учун вақт талаб этилган.
Покистон бош вазири Шаҳбоз Шариф ўз баёнотида воқеа юзасидан ҳамдардлик билдирган ва расмийларни жароҳатланганларга ёрдам беришга кўрсатма берган.
“Биз ушбу оғир дамда ҳалок бўлганлар оилалари билан қалбан биргамиз ва уларга самимий ҳамдардлигимизни билдирамиз”, — дейилган бош вазир девони эълон қилган баёнотда.
Изоҳ (0)