Андижон вилоятида 2022 йилнинг ўтган уч ойи давомида 10 нафар ўқувчи томонидан ўз жонига қасд қилиш ҳолатлари кузатилган. Бу ҳақда «Дарё» мухбири хабар бермоқда.
Таъкидланишича, халқ депутатлари Андижон вилояти кенгаши депутатлари томонидан вилоят ҳокимлиги Болаларни ҳимоя қилиш масалалари котибияти мудири Муфтоҳиддин Рахмановнинг ахбороти тингланган.
Қайд этилишича, вилоятдаги умумтаълим мактабларида вояга етмаган 570 минг 282 нафар ўқувчи таҳсил олади. Ўқувчиларнинг 1348 нафари ота-оналари билан биргаликда хорижга чиқиб кетган, 303 нафари сурункали дарс қолдириши, 935 нафари ноодатий кийингани, 863 нафари жиноятчиликка мойиллиги борлиги, 653 нафари тарбияси оғирлиги аниқланган.Вояга етмаганлар орасида содир этилган жиноят, ҳуқуқбузарликлар ҳамда улар томонидан ўз жонига қасд ёки суиқасд қилиш каби салбий ҳолатлар юзасидан ишлар таҳлил қилинганда, 2022 йил 31 март ҳолатида 25 та вазиятда 48 нафар вояга етмаганлар томонидан жиноят содир этиш ҳолати кузатилгани маълум бўлган. Мазкур жиноятларда иштирок этганларнинг 7 нафари академик лицей ва касб-ҳунар коллежлари, 27 нафари эса мактаб ўқувчилари экани, қолган 14 нафари эса ҳеч қаерда ўқимайдиган ёки ишламайдиганларни ташкил қилиши аниқланган.
Бундан ташқари, умумтаълим мактабларининг 10 нафар ўқувчиси томонидан ўз жонига қасд ёки суиқасд қилиш ҳолатлари кузатилган бўлиб, 2021 йилга нисбатан учтага ортган. Шунингдек, 32 нафар бедарак йўқолган бола ҳуқуқни муҳофаза қилувчи органлар томонидан топилиб, оиласига қайтарилган.
Изоҳ (0)