Бухоро шаҳридаги «Сомонийлар истироҳат боғи»да 30 апрель куни ўзини дарахтга осиб, жонига қасд қилмоқчи бўлган аёл қутқариб қолинди. Бу ҳақда Bukhara news хабар қилди.
Қайд этилишича, шу куни соат 20:30 ларда истироҳат боғида жамоат тартибини сақлашга жалб қилинган Миллий гвардия Бухоро вилояти бошқармаси ҳарбий хизматчилари хизмат олиб борган. Шу пайт боғнинг дарахтлар гавжум қисмида одамнинг бўғиқ овози эшитилган. Зудлик билан ҳолат жойига етиб борган ходимлар катта дарахт шохида матолардан қўлбола усулда тайёрланган қизил рангли арқон ёрдамида ўз жонига суиқасд қилишга уринган аёлни дарахтда осиғлиқ ҳолатда, типирчилаётган вақтда қутқариб қолган.
Тез тиббий ёрдам кўрсатиш хизмати, шаҳар ИИБ навбатчилик қисми воқеа жойига етиб келгунига қадар Миллий гвардия хизматчилари томонидан аёлга биринчи тиббий ёрдам кўрсатилган. Жонига қасд қилмоқчи бўлган ёш аёлнинг шахси аниқланганда у Ғиждувон туманида туғилган, ҳозирда Вобкент туманида истиқомат қилувчи, икки нафар фарзанди бор 30 ёшли Г.Ў. экани маълум бўлган.
Бундан аввал Қашқадарёда 27 ёшли эркак уйининг молхонасида ўзини осиб қўйгани, Фарғонада талаба йигит ва қиз биргаликда ўз жонига қасд қилгани хабар қилинганди.
Шунингдек, Ўзбекистон давлат жаҳон тиллари университети талабаси тўртинчи қаватдан сакраб ўз жонига қасд қилган. Бош прокуратура ҳолат юзасидан текширув ўтказмоқда.
Изоҳ (0)