Тошкентда декан ўринбосари талаба қизга тегажоғлик қилиб, уни ойнадан итариб юборгани ҳақидаги хабарлар кенг жамоатчилик муҳокамаларига сабаб бўлганди. Олий ва ўрта махсус таълим вазирлиги ОТМларидаги тегажоғлик ҳолатлари ҳақида аноним тарзда мурожаат этиш мумкинлигини маълум қилди.
«Азиз талаба-қизлар, опа-сингиллар! Агар сиз таълим олаётган ёки меҳнат қилаётган олийгоҳ, профессионал таълим муассасасида сизга нисбатан бирор-бир кўринишда тегажоғлик, тазйиқ ёки зўравонлик содир этилган бўлса ёхуд ана шундай ножўя хатти- ҳаракатлар таҳдиди остида бўлсангиз ёки гувоҳи бўлган бўлсангиз, ҳеч иккиланмай, Олий ва ўрта махсус таълим вазирлигининг 1006 ишонч телефонига ёки @himoya_otv_bot га мурожаат қилинг!», — дейилади вазирлик хабарида.
Қайд этилишича, мурожаат этган талабаларнинг шахси ва шахсий маълумотлари сир сақланиши кафолатланади. Зарур бўлган барча ёрдам кўрсатилади, ножўя хатти-ҳаракатларга йўл қўймаслик, содир этилган ҳар бир ҳолат бўйича қатъий чоралар кўрилиши таъминланади.
Эслатиб ўтамиз, Низомий номидаги Тошкент давлат педагогика университетининг 3-босқич талабасининг бу борадаги мурожаатини «Nemolchi.uz» эълон қилганди. Унда қиз Зулфия мукофотига тавсиянома олиш мақсадида ёшлар ишлари бўйича 37 ёшли декан ўринбосарининг хонасига кирганида эшикни ичкаридан қулфлаб, унга тегажоғлик қилмоқчи бўлганини, ойна олдига келиб, ёрдамга чақирмоқчи бўлганида эркак уни деразадан итариб юборганини билдирган.
Талаба қиз 18 октябрь куни Республика шошилинч тиббий ёрдам илмий марказига олиб келинган. Тезкор текширувлар натижасида унга кататравма, қўшма жароҳат, ўнг ўтиргич ва қов суякларининг синиб силжиши, қуймуч суягининг ўнг томонда синиб қониқарли туриши, бешинчи бел умуртқаси ён ўсиғининг синиб қониқарли туриши, бош мия ёпиқ жароҳати, бош мия чайқалиши, пешона соҳаси эзилиб йиртилган жароҳати, иккинчи даражали травматик шок ташхислари қўйилган.
Қизнинг яқинлари айтишича, декан ўринбосари томонидан келган одамлар уларга ўз кўрсатмаларини ўзгартиришлари учун пул таклиф қилган. Декан ўринбосари эса ҳаммага қиз ўз жонига қасд қилган демоқда. У ўқиган факультет талабалари тўлиқ онлайн таълимга ўтказилган.
19 октябрь куни декан ўринбосарига нисбатан Жиноят кодексининг 105 (қасддан баданга ўртача оғир шикаст етказиш), 118-моддаси (номусга тегиш) билан жиноят иши қўзғатилган. 23 октябрь куни экспертиза жавоби чиқиши билан декан ўринбосари процессуал тартибда ушланган.
Ҳолатга Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, Ўзбекистонда гендер тенглигини таъминлаш комиссияси аъзоси Саида Мирзиёева муносабат билдириб, талаба қизларга нисбатан шилқимликни жиддий муаммо деб атади. Шу билан бирга жамоатчиликка ошкор этилаётган бу каби ҳолатлар денгиздан томчи эканини таъкидлаб ўтди.
Саида Мирзиёева бу борада Сенат, Бош прокуратура, ИИВ ва ОАВнинг ҳаракатини бирлаштирадиган йирик лойиҳа зарурлигини айтди. Унинг таъкидлашича, айбдорлар жавобгарликдан қоча олмаслиги учун бундай ҳодисаларнинг ҳар бири жамоатчиликка ошкор қилиниши шарт. Зўравонлик қурбонлари уларнинг нидосини эшитадиганлар ва ёрдам берадиганлар борлигига ишончи комил бўлиши, зўравонлар эса жазо муқаррар эканлигини англаши зарур.
Масс-медиа фонди Васийлик кенгаши раиси Комил Алламжонов ҳам Саида Мирзиёеванинг бундай лойиҳа яратиш кераклиги ҳақидаги фикрига қўшилишини билдирди.
Бундан аввал Олий ва ўрта махсус таълим вазирлиги талаба қизга тегажоғлик қилингани айтилган университет раҳбариятига қатъий чора кўрилишини маълум қилганди.
Изоҳ (0)