Ижтимоий тармоқларда Андижон машинасозлик институти талабаси институт биносида ўз жонига қасд қилгани тўғрисида хабарлар тарқалди. «Дарё» ҳолатга аниқлик киритиш мақсадида Бош прокуратура ахборот хизмати билан боғланди.
Ҳаёт Шамсутдинов маълумотни тасдиқлади.
Маълум бўлишича, Андижон машинасозлик институти Логистика йўналиши 2-босқич талабаси 5 август куни талабалар ётоқхонасига бир ўзи келиб, тунаб қолган. Эртасига, яъни 6 август куни соат 09:30 ларда ётоқхона ҳожатхонаси эшигига кабел симидан сиртмоқ ясаб, ўзини осиб, жонига қасд қилган. Ўлим сабабини аниқлаш юзасидан судга оид тиббий ҳамда суд-биологик экспертизаси тайинланган.
Мазкур ҳолат юзасидан Андижон шаҳар прокуратураси томонидан терговга қадар текширув ҳаракатлари олиб борилмоқда.
«Дарё» манбаларининг айтишича, талаба асли Тошкент вилоятидан бўлиб, у 5 август куни ўқув амалиёти ҳисоботини топшириш мақсадида институтга келган. У бошқа талабаларга нисбатан аъло баҳоларга ўқиши, ўзининг хулқи ва иқтидори билан ажралиб турган. 2021 йилдан буён Ўзбекистон ёшлар иттифоқининг факультет етакчиси сифатида институтнинг барча тадбирларида, жамоат ишларида фаоллик кўрсатган.
«Тўғриси бу бола ҳақида ҳамма яхши фикрда. Ҳеч ким, ҳатто ўқитувчилари билан ҳам тортишмаган. Тартибли ва берилган вазифаларни ўз вақтида бажарадиган бола эди. Унинг бундай номақбул иш қилганини эшитиб, ҳайрон қолдик», — дейди «Дарё» мухбири билан суҳбатлашган манба.
Мавзуга доир:
Изоҳ (0)