Қашқадарёда 16 ва 14 ёшли қизлар ўзини осиб қўйди

Қашқадарё вилояти Қамаши туманининг 16-мактаб ўқувчиси ўз жонига қасд қилди. Бу ҳақда «Nasafnews» хабар қилди.

Маълум қилинишича, воқеа жорий йилнинг 5 май куни содир бўлган. Мактабнинг 9-«д» синфи ўқувчиси Э.Қ. (қиз бола) дарсдан сўнг уйига бориб, арқон билан ўзини осиб, жонига қасд қилган ва вафот этган.

Қиз 2006 йил туғилган. Воқеадан аввал ўқитувчилардан бири уни телефондан фойдалангани учун тергаган ва дарс вақтида телефон ишлатиш мумкин эмаслигини айтган.

Ҳолат юзасидан ҳозирда Қамаши тумани прокуратураси томонидан терговга қадар суриштирув ҳаракатлари олиб борилмоқда.

Текшириш доирасида мутасадди идоралар (мактаб, ИИБ ва МФЙ) ходимларига нисбатан хизмат текшируви тайинланган.

Шунингдек,Қарши шаҳридаги 35-умумий ўрта таълим мактабининг 7-Б синф ўқувчиси Ш.Ш. ҳам ўз жонига қасд қилган. Қайд этилишича, воқеа 6 май куни кеч соат 23:00 лар атрофида содир бўлган. «Дарс машғулотлари тугаб уйига борган ва тахминан соат 23:00 лардан кейин уз жонига қасд қилиб, вафот этган», – дейди мактаб масъулларидан бири.

Қўшимча қилинишича, ўқувчи қиз 2008 йил туғилган. Қизнинг нима сабабдан ўз жонига қасд қилгани аниқ эмас.