Бугун Россияда президент сайловлари бўлиб ўтмоқда. Шу муносабат билан “Дарё” сиёсатшунос Сайфиддин Жўраевга мурожаат қилиб, Россиядаги сайловлар бўйича фикр сўради.
“Россиядаги бу йилги сайловларда муаммолик ҳолатлар кўп, олдингиларга нисбатан унчалик силлиқ ўтмаётганини кўриш мумкин. Биринчидан сайловда оппозиция иштирок этмаяпти. Россия ҳукуматига қарши, айниқса, Путинга қарши бўлган Навальнийнинг ўлими билан боғлиқ бўлган ҳолатларни ҳисобга келтириш керак.
Шуни айтиб ўтиш керакки, Навальний ўлгандан кейин Россия жамиятида уни қўлловчилар кўплигини биз кўрдик. Жуда кўпчилик маълум даражада сиёсий ҳокимиятда янги кучлар келиш тарафдори. Бошқа бир жиҳатдан кўрадиган бўлсак, яна Россияга қарши бир қанча санкциялар эълон қилинган. Бундан ташқари, Россия Украина можароси ҳам чуқурлашиб бормоқда.
Мана бу жараёнлар ҳам албатта сайловларга таъсир омили сифатида пайдо бўляпти. Учинчи жиҳатини айтиб ўтиш керакки, Россияга Украинадаги уруш туфайли ҳаддан ташқари кўп санкциялар эълон қилинган. Россия бу санкциялар орқали янгидан янги зарбалар оляпти десак ҳам бўлади. Шу нуқтаи назардан қарайдиган бўлсак, демакки шу санкцияларини четлаб ўтиш учун маълум даражада иқтисодда янада такомиллаштириш учун сайловларда албатта Путиннинг ютиб чиқиши тўғри деб қараш мумкин бўлади. Чунки унга тенг келадиган бошқа номзод йўқ.
Биламизки Россия ҳозирги кунда бутунлай деярли ўзини сиёсатини Шарқ томонга бурди. Мана шу сайлов орқали демак бошқа давлатларга, жумладан, Ўзбекистонга нисбатан муносабатларини қандай бўлишиям яқин йиллар ичида белгилаб олинади. Буни амалга ошириш сайловда ютиб чиқадиган номзод билан боғлиқ бўлади.
Россия—Украина можароси натижасида Россиянинг Осиё томонга бурилиши маълум даражада бу ердаги мамлакатлар билан алоқаларнинг кенгайтириш ям янги бўлган йўналишларни беради. Фақат бир вақтнинг ўзида ҳам Ғарб давлатлари билан ҳам, ҳам Россия билан, ҳам Хитой билан бошқа шунга ўхшаш бошқа давлатлар билан кўп қиррали ҳамкорлигимизни янада чуқурлаштиришимиз керак бўлади.
Бу албатта ҳозирги кучлар нисбати ўзгараётган янги халқаро тартиботлар шаклланаётган шароитда жуда муҳимдир. Демак хулоса қилиб айтишимиз мумкинки Россиядаги бўлаётган сайлов жараёнлари ўзига хос янги тенденцияларни келтириб чиқаради ва мана шу янги тенденциялар ичида Ўзбекистон Россия муносабатларининг такомиллашиши муҳим аҳамиятга эга бўлади”, — дейди Сайфиддин Жўраев.
Изоҳ (0)