“Бойсундаги авария оқибатларини бартараф этиш жуда қисқа вақт ичида амалга оширилди” — Жўрабек Мирзамаҳмудов

Энергетика вазири Жўрабек Мирзамаҳмудов “Лолазор” подкастида Бойсундаги фалокат кўлами ҳақида батафсил маълумот берди. У бундай йирик техноген ҳодисалар олти марта бўлгани, Бойсундаги авария эса рекорд даражада тез бартараф этилганини айтди.

Бойсундаги фалокат Ўзбекистон тарихидаги энг йирик олтинчи техноген ҳалокатдан бири эди. Бироқ унинг оқибатларини бартараф этиш жуда қисқа вақт ичида амалга оширилди. Қийинчилик шунда эдики, фалокат жойида водород сулфиднинг юқори миқдори аниқланди, бу эса ишни сезиларли даражада мураккаблаштирди. Бу газ ускуналарни емирди ва такрорий сизиб чиқишларга олиб келди. Шунга қарамай, мутахассисларимиз тиқинни ўрнатишга ва сизиб чиқишни вақтинча тўхтатишга муваффақ бўлди, дея тушунтирди вазир.

Мирзамаҳмудов ҳодиса жойига халқаро экспертлар жалб қилингани, бу вазиятга тезкор чоралар кўриш имконини берганини таъкидлади.

Озарбайжон ва АҚШдан мутахассисларни таклиф қилдик, улар оқибатларни бартараф этишга ёрдам берди. Бу Ўзбекистон тарихидаги энг тез бартараф этилган фалокатлардан бири бўлди, деди у.

Таъкидланишича, асосий муаммолардан бири қудуқдаги юқори газ босими, мураккаб таркиб ва водород сулфид бўлиб, бу алоҳида хавфсизлик чораларини талаб қилган. У фалокат станциянинг ёпилишига олиб келмаганини айтди.

Барча қийинчиликларга қарамай, Бойсундаги станция ёпилмади. Ишлар давом этмоқда ва биз хавфсизликни таъминлаш ҳамда кейинги сизиб чиқишларнинг олдини олиш учун барча чораларни кўрмоқдамиз, таъкидлади Мирзамаҳмудов.

Шунингдек, у илғор технологиялардан ва барча хавфсизлик чораларига риоя қилган ҳолда тугаллаш ишлари давом этаётганини айтди. Мураккаб шароит ва юқори хавф-хатарлар доимий назоратни талаб этаётгани, ишлар яқин кунларда якунланиши таъкидланди.

Бойсун конидаги авария

• 1 сентябрь куни соат 15:17 да Сурхондарё вилояти Бойсун тумани “Кўлқамиш”  МФЙ ҳудудида жойлашган “Мустақилликнинг 25 йиллиги” конига қарашли 604-сон қудуғида бурғилаш ишлари олиб бориш вақтида технологик жараённинг бузилиши оқибатида олтингугурт (водород сулфид) гази чиқиши кузатилган.
• Аҳоли хавфсизлигини таъминлаш мақсадида кон яқинида яшовчи фуқаролар хавфсиз ҳудудга эвакуация қилинган. Президент топшириғига асосан бош вазир ўринбосари Очилбой Раматов, Фавқулодда вазиятлар вазири Абдулла Қўлдошев, энергетика вазири Жўрабек Мирзамаҳмудов, Сурхондарё вилояти ҳокими Улуғбек Қосимов ҳамда “Ўзбекнефтгаз” бошқарув раиси Баҳодир Сиддиқов ҳодиса жойига етиб борган.
• 15 сентябрь куни соат 16:50 да сизиб чиқиш тўхтатилган. Аммо мазкур конда 17 сентябрь куни яна газ чиқиш ҳолати юз берган. Янги авария оқибатида тўрт киши ҳалок бўлган.