Лавров Ғарб давлатлари Марказий Осиёга «жиддий босим» ўтказаётганини айтди

Россия ташқи ишлар вазири Сергей Лавров Ғарб Марказий Осиё давлатларига «босим» ўтказиб, Москвага қарши санкцияларга қўшилишини талаб қилаётганини айтди. Бу ҳақда «ТАСС» хабар берди.

Вазирнинг сўзларига кўра, Европа Иттифоқи, АҚШ ва Япония Марказий Осиё давлатларидан «Ғарб билан урушда Россия мағлуб бўлар» экан, Москва билан ҳамкорлик қилишдан бош тортишни талаб қилмоқда. Лавров бу борада Европа давлатлари «ғолиб томон»га ўтишни таклиф қилаётганини таъкидлади

«Бундай оғзаки таъсирлардан ташқари, таҳдидлар билан «жиддий босим» мавжуд: ‘Россияга санкцияларни четлаб ўтишга ёрдам беришга йўл қўйманг, акс ҳолда бизнинг бозорларимизни ва мамлакатларингизга киритмоқчи бўлган сармояларни йўқотасиз’», — деб тушунтирди дипломат.

Лавровнинг қайд этишича, Марказий Осиё давлатлари ҳукуматлари бундай таҳдидларни ҳисобга олишга мажбур.

«Биз ҳар бир дўст давлатимиздаги барча хўжалик операторлари эрталаб трибунага чиқиб: «Россияга қарши санкцияларга қаршимиз», дейишларини талаб қилмаймиз. Бизга уларнинг ҳеч бири санкцияларга қўшилмагани кифоя», — деди ТИВ раҳбари.

Аввалроқ Россия ташқи ишлар вазири Қозоғистон ва Ўзбекистон билан «газ иттифоқи»ни яратиш ғоясида ҳеч қандай геосиёсий ўйин йўқлиги ҳақида гапирганди. У Россия, Қозоғистон ва Ўзбекистон умумий газ узатиш тизимига эга қўшни давлатлар бўлиб, улар мавсумий истеъмолнинг энг юқори чўққиларини ҳисобга олган ҳолда газ таъминотида узилишлар бўлмаслигидан манфаатдорлигини қайд этган.