АҚШ Украина делегациясини Саудия Арабистонидаги Россия билан музокараларга таклиф этмади, чунки Вашингтон Москва ва Киев вакиллари билан алоҳида икки томонлама учрашувлар ўтказиб, кейинчалик қўшма учрашув уюштирмоқчи. Бу ҳақда NBC америкалик амалдорлар орасидаги манбаларга асосланиб хабар бермоқда.
Бу бизнинг Россия билан ҳам, Украина билан ҳам бир хил фаолликда ҳамкорлик қилаётганимизни кўрсатади. Биз ўлимларни тўхтатиб, мустаҳкам тинчликка эришишни хоҳлаймиз, деди телеканал суҳбатдошларидан бири.
NBC’нинг Украина президенти атрофидаги манбаси Киевнинг ҳали ҳам Вашингтон ва Москванинг Саудия Арабистонидаги учрашувига таклиф қилинмаганини тасдиқлади.
Россия ва АҚШ делегациялари 18 февраль куни Саудия Арабистонида учрашишини Axios ва “Коммерсант” манбалари хабар қилди. АҚШ томонидан давлат котиби Марко Рубио, махсус вакил Стив Уиткофф ва президентнинг миллий хавфсизлик бўйича маслаҳатчиси Майк Уолц қатнашади.
Украина президенти Владимир Зеленский аввалроқ Киевнинг ушбу учрашувда иштирок этмаслигини маълум қилган эди. Украина ҳукумати АҚШ томонининг келишувни аввал Киев билан, кейин эса Москва билан муҳокама қилишини талаб қилган.
АҚШ президенти Дональд Трампдан Зеленский музокараларга жалб қилинадими, деб сўрашганда, у ижобий жавоб берди, аммо қайси учрашув ҳақида гап кетаётганини аниқлаштирмади. Сиёсатчи, шунингдек, россиялик ҳамкасби Владимир Путин билан Саудия Арабистонида “жуда тез фурсатларда” учрашишини айтди.
Россия ва АҚШ музокаралари 18 февраль куни бўлиб ўтиши мумкин
Манбаларга кўра, Саудия Арабистони пойтахти Ар-Риёдда 18 февраль куни Россия ва АҚШ делегациялари иштирокида Украина бўйича музокаралар бўлиб ўтади.
Яқин кунларда Украина президенти Владимир Зеленский ҳам Саудия Арабистонида бўлади. Ушбу Америка-Россия музокараларида Киев вакили иштирок этмайди. Баъзи маълумотларга кўра, Россия делегацияси таркибига ташқи ишлар вазири Сергей Лавров ҳам киради. 12 февраль куни АҚШ президенти Дональд Трамп россиялик ҳамкасби Владимир Путин билан телефон орқали суҳбатлашди. Кремль музокаралар ўтказилганини тасдиқлади ва Трампни Москвага таклиф этди.
Трамп мазкур суҳбатдан сўнг Украина президентига ҳам қўнғироқ қилди. Зеленскийнинг сўзларига кўра, Трамп суҳбатда Путин билан бўлган мулоқотнинг тафсилотларини айтиб берган. АҚШ президенти Украина раҳбари ҳам, Путин сингари, тинчлик ўрнатишни истаётганини айтган.
14 февраль куни эса Трамп Саудия Арабистонида Украинадаги можарони ҳал этиш бўйича музокаралар ўтказилишини маълум қилди.
Изоҳ (0)