Россия президенти Владимир Путин имзолаган янги қонунга кўра, эндиликда полиция фуқароларнинг банк ҳисобларини суд қарорисиз 10 кунгача музлатиб қўйиш имконига эга бўлади.
Янги тартибга биноан, Ички ишлар вазирлиги терговчилари фуқаронинг муайян жиноятга алоқадорлигидан шубҳаланса, унинг банк ҳисобларини музлатиб қўйиши мумкин. Бу учун прокурор ва тергов органи раҳбарининг розилиги талаб этилади холос. Шундан сўнг расмийлар судга расмий аризани 10 кун ичида юбориши талаб этилади.
Авваллари бундай механизм фақат мол-мулк мусодара қилинадиган ишлар бўйича қўлланилган эди. Энди эса полиция активларни “шубҳага асосланиб олдиндан блоклаши” мумкин бўлади.
Шунингдек, янги қонун билан банклар ҳуқуқни муҳофаза қилувчи органларнинг фуқаро банк ҳисоби ва пул ўтказмалари ҳақида сўровларига уч кун ичида жавоб бериши керак бўлади. Агар сўров электрон шаклда юборилса, муддат 24 соатгача қисқаради.
Расмийлар бу ўзгаришлардан мақсад кибержиноятлар ва молиявий фирибгарлик ҳолатларига қарши кураш эканини таъкидламоқда. Бироқ ҳуқуқшунослар қонуннинг аниқ мезонлари йўқлигини ва у суистеъмол ҳолатларига йўл очиши мумкинлигини билдиришган.
Адвокат Юлий Тайнинг айтишича, қонунда қайси жиноятлар учун банк ҳисоблари музлатилиши аниқ кўрсатилмаган. Шу билан бирга, музлатиладиган сумма зарар миқдорига мос бўлиши кераклиги ҳам белгилаб қўйилмаган.
Яна бир мутахассис Руслан Зафесов ҳуқуқни муҳофаза қилиш органларига берилган янги ваколатлар ортидан мулкни асоссиз мусодара қилиш хавфи кучайишини таъкидлаган. Бошқа танқидчилар эса ушбу қонун сиёсий мухолифлар, журналистлар ва фаолларни босим остига олиш учун ҳам ишлатилиши мумкинлигидан хавотирда.
Изоҳ (0)